Trajneri i Chelsea, Thomas Tuchel, ka thënë se do të kontaktojë Pierre-Emerick Aubameyang, pas incidentit të këtij të fundit tek Arsenal, ku i është hequr shiriti i kapitenit. Sulmuesi i “topçinjëve” u dënua, për shkak se u kthye me vonesë nga një udhëtim jashtë vendit, Mbi të u mor një masë disiplinore nga klubi.
E ardhmja e Aubameyang tek Arsenal është tashmë në dyshim, teksa ai u la jashtë ndeshjes në Premier League kundër West Ham. Në këtë situatë, po përflitet gjithnjë e më shumë për një ribashkim të sulmuesit nga Gaboni, me ish-trajnerin e tij të vjetër, Thomas Tuchel.
Aubameyang punoi nën drejtimin e Tuchel tek Borussia Dortmund, dhe sulmuesi ndihmoi teknikun gjerman të fitonte trofeun e tij të parë madhor si trajner, DFB Pokal në vitin 2017. Ka qënë vet Tuchel që ka shprehur keqardhjen e tij për atë çka i ndodhi Aubameyang, dhe ka thënë se planifikon të kontaktojë ish-lojtarin e tij. Tuchel deklaroi:
“Në një moment do të kontakoj Aubameyang. Më vjen keq që është në telashe. Unë besoj në karakterin e tij pozitiv, por nuk jam i përfshirë në këtë situatë apo në klubin e tij, ka të bëjë vetëm me marrëdhënien mes meje dhe tij.”
Ndërkohë trajneri i Arsenal komentoi më në detaje situatën, nisur dhe nga thashethemet për një lëvizje të mundshme të Aubameyang drejt Chelsea. Spanjolli tha:
“A ka luajtur ai ndeshjen e tij të fundit për Arsenal? Gjithçka që mund të them është se për momentin, ai është jashtë skuadrës, ai nuk është i përfshirë dhe fatkeqësisht, ky është vendimi që ne kemi marrë. Ajo që mund të them tani është se, ju mund ta kuptoni se është shumë për t’u tretur dhe një vendim vërtet i vështirë për t’u marrë, kështu që na duhet pak kohë.”