Drejtuesit e Chelsea janë duke mbajtur bisedime me gjermanët e Leipzig, për mundësinë e rikthimit të sulmuesit tek ish-klubi i tij. Sipas mediave angleze, bëhet fjalë për një rikthim në formë huazimi, pasi londinezët ende nuk janë të gatshëm të heqin dorë prej tij.
Sulmuesi gjerman la Leipzig për t’iu bashkuar Chelsea në vitin 2020, por që prej atij momenti ka dështuar të ketë impaktin e pritur prej tij në ekipin e Thomas Tuchel. Werner ka shënuar vetëm 10 gola në 56 ndeshje gjithsej në Premier League.
Chelsea ndërkohë ka përforcuar repartin e sulmit me afrimin e Raheem Sterling nga Manchester City. Megjithatë, londinezët gjithashtu vendosën të largojnë Romelu Lukaku në formë huazimi drejt Inter.
Megjithatë, kur vjen fjala te Werner, problemi më i madh në lidhje me strategjinë e largimit është paga e futbollistit. Në mënyrë që huazimi të realizohet, lojtari duhet të pranojë një uje page, duke qënë se fuqia financiare e klubeve gjermane, nuk krahasohet me atë të klubeve në Premier League. Opsioni tjetër është skenari ku Chelsea paguan një pjesë të pagës së futbollistit, por kjo ka më pak mundësi të ndodhë.
Gjatë turit para-sezonal të bluve në Amerikë, Timo Werner la të kuptohej se mund të ishte i lumtur, dhe në një klub tjetër. Por trajneri Tuchel u tregua i shpejtë duke iu përgjigjur komenteve të lojtarit. Tekniku deklaroi:
“Do të isha një nga njerëzit më të lumtur në planet nëse do të kisha një kontratë me Chelsea.”
Newcastle është gjithashtu një nga ekipet e interesuara për kartonin e gjermanit, por kërkesat që Werner ka për pagën mund të rezultojnë shumë të larta për një klub që ka ende shumë punë për të bërë në Premier League. Të besuarit e Eddie Howe duan të bëjnë pjesë në elitën e klubeve angleze, dhe për këtë qëllim, kanë në plan të rekrutojnë dhe 2 sulmues të tjerë.
