Fundjavën e kaluar, presidenti i Barcelonës, Joan Laporta, bëri me dije se klubi mund të afrojë deri në 3 lojtarë të rinj gjatë merkatos së janarit. Ky numër duket ambicioz, duke marrë parasysh situatën financiare në të cilën gjendet ekipi spanjoll. Afrimi i lojtarëve do të varet shumë dhe nga largimet që do të ndodhin tek blaugranat. Ajo që ka më shumë mundësi të ndodhë, është afrimi në skuadër i një sulmuesi të ri.
Mes alternativave të tjera, në shtypin spanjoll po qarkullon emri i Timo Werner. Gjermani është linkuar me një lëvizje të mundshme drejt klubit spanjoll në janar. Barcelona e ndoqi me vëmendje sulmuesin, përpara se ai të largohej nga Leipzig dhe të nënshkruante me Chelsea në Angli.
Spanjollët dëshirojnë të futen përsëri në lojë për shërbimet e Werner, dhe ky mund të jetë momenti i duhur. Gjermani po kalon një periudhë të vështirë në Premier League, ku ka humbur vendin e titullarit tek Chelsea. Werner ka luajtur vetëm 388 minuta gjatë këtij sezoni në kampionat, në ndryshim nga viti i kaluar, ku ishte titullar absolut. Laporta thuhet se e ka studiuar mirë situatën, dhe është i prirur të pranojë një ofertë në formë huazimi.
Por nëse skenari Werner nuk realizohet, Barcelona ka një lojtar tjetër në mendje. Ai është Edinson Cavani. Situata e tij tek Manchester United është pak a shumë si ajo e Werner te Chelsea. Cavani nuk është titullar i rregullt në skuadrën e Solskjaer, dhe kjo gjë ka shkaktuar pakënaqësi te uruguaiani.
Sulmuesi është tashmë 34 vjeç, por eksperienca e tij mund të rezultojë shumë e nevojshme për Barcelonën. Katalanasit kanë një skuadër të mbushur plot me talente të reja, të cilat kanë nevojë për udhëzime dhe mbështetje në fushën e lojës. Këtë gjë, nuk mund ta bëjë vetëm trajneri Xavi.
