Londinezët e Tottenham janë vënë në lëvizje për të sjellë në Wembly mesfushorin e Milan, Franck Kessie, gjatë merkatos së janarit. 25 vjecarit nga Bregu i Fildishtë i skadon kontrata në fund të sezonit, dhe lojtari ia ka bërë të qartë drejtuesëve të Milan, dëshirën për t’u larguar në verë. Por këta të fundit nuk duan të humbasin me kosto zero talentin e tyre, dhe për këtë arsye, janë duke parë opsionet e një transferimi muajin e ardhshëm.
Kessie ka shënuar 5 gola në 16 ndeshje të Serie A këtë sezon, dhe Milan i ka ofruar futbollistit një kontratë të re me vlerë rreth 5 milionë paundë në vit. Por ish-lojtari i Atalanta e ka refuzuar ofertën. Kjo ka sjellë dhe përfshirjen në bisedime të drejtuesëve të klubit italian, me Tottenham, që është i interesuar për mesfushorin.
I pyetur për planet e transferimit gjatë merkatos së janarit, trajneri i Spursave, Antonio Conte nuk dha një përgjigje specifike. Italiani u shpreh:
“Në këto momente nuk mund t’i përgjigjem kësaj pyetjeje. Fokusi im është tek lojtarët aktualë dhe puna për të përmirësuar situatën. Pas këtij momenti, me siguri do të kemi një mbledhje me klubin ku do të diskutojmë nëse ka mundësi për të përmirësuar organikën tonë nëpërmjet transferimeve.”
Dhe duket se ardhja e italianit në krye të pankinës së Tottenham i ka dhënë një ndryshim të dukshëm stilit të tyre të lojës. Por mbi të gjitha, Conte po arrin të nxjerrë përsëri më të mirën nga Harry Kane. Pas një starti sezoni të vështirë për sulmuesin, golat ndaj Liverpool dhe Crystal Palace janë një tregues i qartë se kapiteni i kombëtares së “3 Luanëve” po i rikthehet formës së tij më të mirë.
Ndërkohë nga ana tjetër, Manchester United dhe Arsenal thuhet se gjithashtu janë të interesuar në shërbimet e Kessie, por drejtuesit e Tottenham kanë hedhur hapa konkretë duke takuar përfaqësuesit e lojtarit.
