Manchester United ka arritur akordin me Real Madrid për transferimin e brazilianit Casemiro. Mesfushori do të firmosë një kontratë 4 vjeçare me “Djajtë e Kuq”, me opsionin për të rinovuar dhe 1 vit shtesë. Lëvizja do t’i kushtojë 70 milionë paundë Manchester United.
Që prej vitit 2013, Casemiro ka qënë pjesë e gjigandëve spanjollë, duke fituar 3 herë La Liga-n dhe plot 5 herë Champions League. Kartoni i lojtarit do t’i kushtojë shumë United, teksa Casemiro do të përfitojë një pagë javore prej 350,000 paundësh, një shifër e jashtëzakonshme dhe gati dyfishi i asaj që braziliani përfiton tek Real Madrid.
Por përse Ten Hag zgjodhi pikërisht Casemiro?
Veterani i Real Madrid gjithmonë ka preferuar të mbrojë topin pranë zonës së tij, dhe ky lloj pozicionimi mund t’i vlejë shumë United, që ka shfaqur vazhdimisht pasiguri në prapavijë. Pavarësisht aftësive jo dhe aq të mira për të dribluar apo nisur kundërsulme të shpejta, inteligjenca në mbrojtje e Casemiro ka qënë ajo që i ka dhënë balancën e duhur mesfushës së Real Madrid. Por sa do të përshtatet braziliani me modelin aktual të lojës tek “Djajtë e Kuq”?
Nëse trajneri Ten Hag i qëndron besnik modelit të lojës me presing të lartë, “ngathtësia” e Casemiro mund të ekspozohet. Shpejtësia nuk është pika e fortë e mesfushorit dhe kjo mund të kthehet në problem, sidomos ndaj ekipeve si Arsenal apo Manchester City, që dinë të shfrytëzojnë mjaft mirë hapësirat e vogla të lëna pas.
Por në krahun tjetër, braziliani ka shfaqur aftësi mjaft të mira kur është aktivizuar në një pozicion më ofensiv. Sezonin që lamë pas, Casemiro ia doli të shënojë 7 gola, duke lënë të kuptohet se mund të kontribuojë në të njejtën mënyrë dhe tek Manchester United. Gjithsesi, mbetet për t’u parë se cili është plani i Erik ten Hag për të.