Kapiteni i kombëtares angleze, Harry Kane ka thënë se do të qëndrojë te Tottenham këtë verë, dhe është 100% i fokusuar për të ndihmuar klubin e tij drejt sukseseve. Sulmuesi i ka dhënë kështu fund peripecisë së transferimit të tij drejt Manchester City. Anglezi mendohej se kishte arritur një marrëveshje jo-zyrtare me presidentin e Tottenham, Daniel Levy, për largimin e tij në fund të verës, por mesa duket gjërat kanë marrë një rrjedhë tjetër.
Kane luajti ndeshjen e tij të parë të sezonit të ri me Spursat ditën e diel, në fitoren 1-0 që skuadra e tij regjistroi përballë Wolves. Sulmuesi u fut në fushën e blertë si zëvëndësues, dhe tifozët e Tottenham u shfaqën mjaft të lumtur me rikthimin e yllit të tyre kryesor në formacion. Në një postim të fundit në rrjetet sociale, Kane deklaroi:
“Ishte e jashtëzakonshme të shihje suportin e e fansave ditën e diel, si dhe të lexoje mesazhet që kam marrë javët e fundit. Do të qëndroj te Tottenham këtë verë, dhe do të jem 100% i fokusuar për të ndihmuar skuadrën të arrijë suksese.”
Lajmi sigurisht që ka bërë të lumtur dhe numrin 1 të pankinës së Tottenham, Nuno Espirito Santo. Trajneri u shpreh:
“Mendoj se që kur Harry iu bashkua ekipit ka punuar fortë, dhe kjo është ajo që vlerësojmë. Performanca dhe sjellja e tij në stërvitje ka qenë fantastike. Tashmë është kapitull i mbyllur, Harry do të qëndrojë me ne.”
Duke qenë se Kane u shpreh se do të qëndrojë këtë verë te Spurs, lind rrjedhimisht pyetja nëse ai mund të largohet gjatë merkatos së janarit. Nuno Santo nuk u duk i shqetësuar nga ky fakt:
“Nuk jam aspak i shqetësuar. Ai është një opsion për të nesërmen. Ky është mendimi im i vetëm, të ndërmarr vendimet më të mira për të ndihmuar ekipin, dhe Kane momentalisht është një alternativë.”