Lionel Messi ka pak gjasa të pranojë një rinvim kontrate me PSG. Negociatat mes klubit parizien dhe yllit argjentinas kanë mbetur në vend, teksa mediat franceze bëjnë me dije se Leo është në kërkim të një aventure të re.
Kampionët francezë kërkojnë që Messi të pranojë një ulje rroge prej 25%, por ish-ylli i Barcelonës nuk është i gatshëm ta pranojë këtë kusht. Sipas kontratës aktuale, Messi përfiton rreth 40 milionë euro në vit. Për momentin negociatat janë ndalur ndërkohë që pritet një takim tjetër mes babait të Leo Messi dhe drejtuesëve të PSG në ditët e ardhshme.
Superstari argjentinas nuk ka qënë në formën më të mirë të mundshme me PSG dhe drejtuesit e klubit janë të pasigurt nëse lojtari mund të ndihmojë parizienët në fitimin e Champions League. Kujtojmë se PSG u eleminua nga Bayern Munich këtë sezon.
Prestigjozja ESPN raportoi se Messi nuk ishte i lumtur pas fishkëllimave të tifozëve, në dy sfidat e fundit të PSG në shtëpi. Argjentinasi i ka lënë të gjitha dyert të hapura për të ardhmen dhe opsionet nuk mungojnë.
Rikthimi tek Barcelona po përmendet gjithnjë e më shumë, teksa trajneri i katalanasve, Xavi Hernandez, nuk e ka fshehur dëshirën për të patur Messin në Camp Nou. Ndërkohë, një tjetër alternativë e përmendur prej kohësh është dhe Inter Miami në kampionatin amerikan të futbollit. Megjithatë, klubi nga MLS ende nuk ka një ofertë konkrete për shërbimet e Messi. Sipas burimeve pranë lojtarit, argjentinasi është i gatshëm të luajë në Amerikë përpara se të mbyllë karrierën e tij.
Ndërkohë interesi nuk ka munguar as nga Arabia Saudite, teksa Al Ittihad ka përgatitur një ofertë marramendëse për shërbimet e superstarit. Gjithsesi, kjo alternativë nuk është prioritare për Messin, i cili preferon një aventurë në Europë.