Superstari argjentinas i Barcelonës, Lionel Messi, ka vendosur të qëndrojë përsëri me katalanasit, të paktën deri në vitin 2026. 34 vjeçari ishte një lojtar i lirë, duke qenë se kontrata e tij skadoi që në datë 30 qershor. Gjithsesi, në mënyrë që marrëveshja të arrihej, numri 10 i Barcelonës ka pranuar përgjysmimin e pagës së tij fillestare vjetore, e cila përllogaritej në £123 milion në sezon.
Kontrata e re parashikon dhe një klauzolë për largimin e mundshëm të lojtarit, pas 2 vitesh. Megjithëse lajmi për marrëveshjen është mjaft i sigurtë, ende nuk ka ardhur zyrtarizimi public i saj. Një prej arsyeve mendohet se është fakti që Leo Messi momentalisht është me pushime, pas triumfit në Copa America. Gjithashtu, disa kufizime të La Liga në lidhje me kontratat e lojtarëve kanë bërë që zyrtarizimi i rinovimit të Leo Messit të vonojë dhe për pak kohë.
Barcelona gjithashtu raportohet se është në bisedime serioze me Atletico Madrid, për një shkëmbim të mundshëm të Antoine Griezmann me mesfushorin Saul Niguez. Megjithëse nuk ka ende një marrëveshje mes klubeve, portalet vendase thonë se gjigandët spanjollë janë të 2 të interesuar për këtë lëvizje.
Objektivi kryesor i presidentit të ri të Barcelonës, Joan Laporta, ishte nënshkrimi i kontratës së re me Lionel Messin, dhe duket se kjo gjë është tashmë realitet. Pas fitores së Copa America, argjentinasi është më i motivuar për të vazhduar rrugëtimin e tij me ekipin e zemrës. Kjo do të thotë se lëvijzet e përfolura në MLS do të duhet të presin, të paktën dhe 2 vite të tjera.
Messi ishte përfolur disa herë dhe për një lëvizje të mundshme te Paris St-Germain, si dhe tek Manchester City, ku do të ribashkohej me trajnerin e tij të vjetër, Pep Guardiola. Por mesa duket, edhe pas kaq shumë vitesh, Leo Messi nuk ka ndërmend të ndërrojë fanellë!
