Drama e largimit të Lionel Messit nga Barcelona mesa duket është mbyllur përfundimisht, me konfirmimin e argjentinasit, si lojtari më i ri i PSG. 34 vjeçari ka rënë dakord për një kontratë 2 vjeçare me parizienët, dhe pritet të luajë përkrah Mbappe dhe Neymar, duke formuar kështu një treshe të “frikshme” në sulm. Gazetari spanjoll Guillem Balague ka bërë të ditur detajet e transferimit, si dhe planet e PSG, tani që në ekip kanë superstarin argjentinas. Balague u shpreh:
“Dallohet qartësisht se ajo që drejtuesit e PSG duan është një ekip që arrin finalen e Champions League çdo vit. Me Messin sigurisht që ke një avantazh. Fakti që Pochettino është në krye dhe kontrata e tij u rinovua do të thotë se ata (drejtuesit) e kanë një ide se si mund ta arrijnë këtë gjë.
Ata do të fitojnë kampionatin, është gati e sigurt tani, pavarësisht se e humbën sezonin e kaluar. Për Messin do të jetë një kampionat më pak kompetitiv, që do të thotë se do të jetë më i freskët në Champions League.”
Përpara largimit nga Spanja, Messi pranoi përgjysmimin e rrogës së tij, në mënyrë që të qëndronte në klub. Gjithsesi, Baracelona nuk ishte në gjendje të firmoste kontratën e re, për shkak të limitit të pagave të vendosur nga La Liga. Gazetari Balague analizoi dhe aspektin financiar të transferimit:
“Ai (Messi) fitonte rreth 140 milionë euro në sezon tek Barcelona. Nga kjo 40-50% shkonin për taksa. Messi pranoi qëndrimin, duke përgjysmuar pagën e tij. Një ulje më e madhe do të konsiderohej shkelje sipas ligjit spanjoll. Barcelona gjithsesi është 1 miliardë euro në borxhe. Ata nuk mund ta përballonin.”
Nëse formalitetet e marrëveshjes me PSG mbyllen shpejt, argjentinasi mund të bëjë debutimin e tij përballë Strasbourg ditën e shtunë.
