Një nga yjet më të shquar kroatë të sezonit që lamë pas, Borna Sosa, është lënë jashtë grupit të kombëtares për Europianin 2020. 23 vjeçari me kombësi kroate dhe gjermane ishte mes 2 zgjedhjesh, pikërisht kombëtares së “Panzerave” dhe Kroacisë. Mesa duket, dilema e vështirë ka bërë që Sosa të mos aktivizohet me asnjërën prej tyre në Euro 2020.
Mbrojtësi i ekipit të Stuttgart konsiderohet prej shumë analistësh, por dhe fansash, si mbrojtësi anësor më i mirë që prej Robert Jarni. Ky i fundit është aktivizuar në vitet 90’ me Juventus dhe Real Madrid. Borna Sosa është dalluar në veçanti dhe për aftësitë e tij ofensive. Krosimet e sakta kanë qenë arma e fortë e mbrojtësit me ekipin e Stuttgart, teksa ka shënuar 128 krosime në 26 ndeshje, si dhe ka asistuar në mënyrë direkte 9 gola. Fatkeqësisht, talenti i ri nuk do të mund t’i sjellë freskinë kaq shumë të nevojshme përfaqësueses kroate.
Ekipi i drejtuar nga Zlatko Dalić ka në organikën e tij, vetëm 6 lojtarë nga finalja e Kupës së Botës përballë Francës në vitin 2018. Ivan Rakitić dhe Mario Mandžukić janë shkëputur nga detyrat ndërkombëtare, por lajmi i mirë është se Dalić ka ende në dispozicionin e tij, eksperiencën e Luka Modrić dhe Ivan Perišić. Dy superstarët kroatë përbëjnë dhe bërthamën e modelit të lojës së skuadrës.
Kujtojmë se Kroacia do të startojë aventurën e saj europiane përballë Anglisë, në datë 13 qershor në Wembley. Përballja rikthen emocionet e gjysmëfinales së Botërorit 2018, ku kroatët mposhtën anglezët në kohën shtesë me 1 gol të Mario Mandžukić. Gjithsesi, gjërat kësaj rradhe duken më ndryshe, me një Kroaci më pak entuziaste dhe një Angli më të karikuar dhe të uritur për sukses. Duket se Kroacia do të mbështetet te veteranët e saj, Luka Modrić dhe Ivan Perišić, për një rezultat pozitiv.
