Me Europianin e këtij viti që është gjithnjë e më afër, mediat sportive dhe analistët kanë filluar të diskutojnë dhe mbi favoritët e mundshëm për të ngritur lart trofeun. Mes ekipeve “big”, padyshim qëndron dhe kombëtarja italiane. “Gli Azzurri” janë padyshim një nga përfaqësueset që kanë lënë shenjën e tyre në historinë e futbollit. Por a do të jenë ata në nivelin e duhur për t’u shpallur kampionë të Europës?
Treguesit dëshmojnë se po!
Skuadra e drejtuar nga Roberto Mancini ka arritur të adaptojë një mentalitet fitues, teksa kanë 26 ndeshje pa pësuar disfatë. Humbja e fundit e italianëve daton në vitin 2018, përballë Portugalisë në shifrat minimale 1-0. Që prej asaj kohe shumë gjëra kanë ndryshuar, dhe duket se Italia e ka lënë pas shijen e hidhur të mos kualifikimit në Botërorin e vitit 2018.
Kombëtarja azure ka formuar një filozofi të qartë loje dhe një identitet të sajin që dëshmohet dita-ditës në çdo përballje. Formacioni i ri 4-3-3 është mjaft fluid, duke i dhënë mundësi trajnerit Mancini të improvizojë me lojtarë të ndryshëm, pa i prishur punë objektivave të ekipit. Një tjetër pikë e fortë e kombëtares, janë lojtarët me eksperiencë. Leonardo Bonucci dhe Giorgio Chiellini janë dy kryesorët të cilët me përvojën e tyre pritet t’i japing sigurinë e duhur italianëve. Mosha e mbrojtësve nuk do të jetë një problem i madh, sidomos në një kompeticion të shkurtër si Euro 2020.
Eksperienca si pikë e fortë e italianeve!
Eksperienca nuk është e vetmja pikë e fortë e italianëve. Në portë ata mund të mbështeten tek gjigandi i Milan, Gianluigi Donnarumma. Në mesfushë, kreativiteti i Marco Verratti mund të bëjë të gjithë diferencën. Ndërsa në sulm, dyshja potente Lorenzo Insigne dhe Federico Chiesa ka aftësinë të vërë në vështirësi çdo mbrojtje europiane. Dhe sigurisht të mos harrojmë dhe bomberin, Ciro Immobile. Me këto talente, duket se italianëve u duhet vetëm përqëndrim, dhe pak fat për të kapur majat e Europës këtë vit.
