Anglia e Gareth Southgate nuk e ka nisur aspak mirë Nations League, teksa në 4 ndeshje të luajtura nuk ka siguruar dot asnjë fitore. Kjo do të thotë se “3 Luanët” nuk mund të arrijnë finalet e kompeticionit, por gjithsesi do të luajnë ndeshjet përmbyllëse ndaj Italisë dhe Gjermanisë.
Kapiteni i Liverpool, Jordan Henderson, është grumbulluar përsëri nga trajneri Southgate, pavarësisht dyshimeve fillestare për formën e tij fizike. 32 vjeçari ka vuajtur së fundmi një dëmtim muskulor dhe vendi i tij në kombëtaren angleze ishte në dyshim. Gjithsesi, mesfushori i është bashkuar tashmë skuadrës në St George’s Park. Henderson ka zëvëndësuar talentin e Manchester City, Kalvin Phillips, i cili u tërhoq në fundjavë për shkak të një dëmtimi në shpatull.
Ndërkohë, një tjetër surprizë është thirrja në skuadër e talentit të Brentford, Ivan Toney. Ky i fundit tha se asnjëherë nuk e kishte vënë në dyshim faktin se do të merrte një thirrje nga Gareth Southgate. 26 vjeçari ka impresionuar këtë vit në Premier League, duke shënuar 5 gola në 7 ndeshje. Pas zyrtarizimit të lajmit, Toney u shpreh për mediat:
“Ndiej sikur kam besim të plotë tek vetja ime. Nuk kam luajtur asnjëherë për ekipet e moshave, dhe të shkosh direkt në përfaqësuesen kryesore është një arritje e madhe. Është një mundësi e jashtëzakonshme që unë të provoj veten. Por duhet t’i marr ndeshjet një nga një. Mbase aktivizohem për disa minuta në këto sfida.”
Anglia e Gareth Southgate do të luajë ditën e premte përballë Italisë në transfertë. Më pas, “3 Luanët” do të mbyllin këtë edicion të Nations League në shtëpi përballë Gjermanisë, ditën e hënë. Sfidat janë mjaft të rëndësishme duke qënë se janë përballjet e fundit përpara startit të Kupës së Botës në nëntor.
