Skocia do të vuajë mungesat e Kieran Tierney dhe Scott McKenna, në përballjen e së martës me Ukrainën në Nations League. Sfida është e një rëndësie të veçantë, pasi do të përcaktojë se cili ekip do të mbyllë grupin në vendin e parë. Skocezët mjafton të shmangin humbjen për të arritur objektivin e tyre, ndërkohë që Ukraina duhet të marrë me patjetër 3 pikë nëse do të kryesojë.
Mbrojtësi i Arsenal, Tierney, dhe lojtari i Nottingham Forest, McKenna, startuan të dy në përballjen që Skocia zhvilloi javën e kaluar me Ukrainën e cila u mbyll me fitoren 3-0 të të zotëve të shtëpisë në Glasgow. Tierney dhe McKenna gjithashtu luajtën në fitoren 2-1 ndaj Republikës së Irlandës, ditën e shtunë. Gjithsesi, lojtarët nuk do të jenë të disponueshëm për teknikun Steve Clarke, për shkak të dëmtimeve dhe gjendjes jo të mirë fizike. Mesfushori Scott McTominay gjithashtu nuk do të luajë, për shkak se është i pezulluar.
Kapiteni i skocezëve, Andy Robertson, pritet që të mungojë përsëri për shkak të dëmtimit, dhe vendin e tij pritet ta zërë Greg Taylor i Celtic. Në përballjen e parë me Ukrainën ishte Nathan Patterson ai që startoi takimin në krahun e djathtë të mbrojtjes, por lojtari u zëvëndësua pasi pësoi një dëmtim në gju.
Trajneri Clarke ka dhe një tjetër opsion mjaft interesant në dispozicion për përballjen me Ukrainën. Bëhet fjalë për mbrojtësin e Hellas Verona, Josh Doig. Ky i fundit është kapiteni i kombëtares skoceze U21, por nuk është përfshirë asnjëherë në një sfidë me kombëtaren e parë.
Qendra e mbrojtjes është gjithashtu një problem për Skocinë, duke qënë se Grant Hanley dhe Liam Cooper janë gjithashtu të padisponueshëm. Ryan Porteous është i vetmi opsion që Clarke ka momentalisht, por lojtari i Hibernian nuk ka mjaftueshëm eksperiencë në nivel ndërkombëtar.