Ndeshjet e futbollit në Angli, Irlandën e Veriut dhe Skoci janë shtyrë këtë fundjavë, në shenjë respekti për ndarjen nga jeta të Mbretëreshës Elizabeth II. Përveç futbollit dhe shumë aktivitete të tjera sportive gjithashtu janë shtyrë në javët pasardhëse. Garat me kuaj do të rikthehen ditën e diel, ndërkohë që mes kompeticioneve që janë prekur është sigurisht dhe Premier League, ku 10 ndeshje janë anulluar dhe do të luhen në një datë të dytë. E njejta gjë vlen dhe për EFL dhe kompeticionet e femrave. Kampionati skocez gjithashtu ka shtyrë ndeshjet e parashikuara. Megjithëse kompeticionet sportive nuk ishin të detyruara t’i bashkoheshin zisë në nder të Mbretëreshës Elizabeth, shumë prej drejtuesëve të organizatave sportive u shprehën se ky ishte vendimi i duhur. Drejtori ekzekutiv i Premier League, Richard Masters, deklaroi:
“Ne dhe klubet tona duam të nderojmë shërbimin e gjatë dhe të parreshtur që Madhëria e Saj i ka dhënë vendit tonë. Kjo është një kohë jashtëzakonisht e trishtë, jo vetëm për kombin, por dhe për miliona njerëz në botë që e adhuronin atë, dhe prandaj bëhemi bashkë me ta në mbajtjen e kësaj zije.”
Ndërkohë përsa i përket rifillimit të sfidave, ende nuk ka një date të caktuar, por drejtori Masters deklaroi se Premier League do të njoftojë publikun shumë shpejt në vazhdim. Ndërkohë në Skoci u ndalën aktivitetet e Scottish Professional Football League, Scottish Women’s Premier League, si dhe Scottish Highland. Drejtori ekzekutiv i SPFL, Neil Doncaster, deklaroi se do të ketë update të mëtejshme për zhvillimin e ndeshjeve, që do të vendosen pasi gjithçka të jetë rakorduar fillimisht me ceremoninë mortore të Mbretëreshës.
Mbretëresha Elizabeth II ishte monarkja më jetëgjatë e Mbretërisë së Bashkuar. Ajo vdiq në moshën 96 vjeçare, pas 70 vitesh në fron.
