Drejtuesit e Newcastle po shpresojnë të zyrtarizojnë afrimin e Unai Emery, përpara ndeshjes të së shtunës përballë Brighton. 49 vjeçari është momentalisht në krye të Villarreal, ekip që po zhvillon paraqitje të mira në kampionatin spanjoll. Pas shkarkimit të trajnerit Bruce, emri i Emery ka dalë së fundmi si alternativa kryesuese, në garën për stolin e Newcastle United.
Problemi kryesor është që kontrata e Emery me klubin spanjoll skadon në vitin 2023. Paratë nuk janë shqetësimi primar i bordit të Newcastle, por dëshira e trajnerit spanjoll ende nuk është e qartë. Emery drejtoi Villarreal në sfidën përballë Young Boys të vlefshme për Champions League. Në konferencën për shtyp përpara takimit, tekniku u pyet për raportimet që e lidhnin atë, me postin vakant të trajnerit tek Newcastle. Por Unai tha se nuk ishte në dijeni të këtyre lajmeve.
Ndërkohë tabloidet sportive bëjnë me dije, se Newcastle ka patur kontakte dhe me ish-trajnerin e Bournemouth, Eddie Howe. Në të njejtën kohë, ish-trajneri i Romës, Paulo Fonseca, është gjithashtu një opsion.
Kujtojmë se Unai Emery qëndroi për 18 muaj në krye të Arsenal, përpara shkarkimit të tij në nëntor të vitit 2019. “Topçinjtë” prisnin më shumë nga spanjolli, por mos-arritja e objektivave tek Arsenal nuk i heq kurrsesi meritat trajnerit të Villarreal.
Në 3 sezone tek Sevilla, nga viti 2013 në 2016, Emery fitoi 3 herë rresht trofeun prestigjoz të Europa League. Më pas trajneri u vendos në krye të PSG, ku fitoi Ligue 1 dhe 2 herë Kupën e Francës. Gjithsesi tekniku dështoi të përmbushte objektivin madhor të francezëve, triumfin në Champions League.
Por Unai Emery duket zgjedhja perfekte për Newcastle United, që kërkon fillimisht të rrisë nivelin e lojës si klub, duke u shndërruar në një skuadër kompetitive. Këtë gjë, Emery e ka arritur me çdo ekip që ka trajnuar.
