Sulmuesi i Villarreal, Fer Nino, ka kërkuar falje për faullin e rëndë, që la mbrojtësin e Leicester, Wesley Fofana me këmbë të thyer. Dëmtimi ndodhi në një ndeshje miqësore para sezonale mes ekipeve, dhe trajneri i Leicester, Brendan Rodgers, e cilësoi si një faull të tmerrshëm. Fer Nino kërkoi ndjesë në mënyrë publike, nëprmjet një postimi në Instagram:
“Po shkruaj për të kërkuar falje publikisht, ashtu siç bëra dhe privatisht me atë (Fofana). Qëllimi im nuk ishte asnjëherë që ta dëmtoja, siç fatkeqësisht ndodhi. Shpresoj sinqerisht që Wesley të ketë një rikuperim të shpejtë dhe të rikthehet në fushë sa më shpejt të jetë e mundur, për të treguar që është një futbollist i kalibrit të lartë.”
Trajneri Rodgers gjithashtu konfirmoi se Unai Emery, tekniku i Villarreal i kishte kërkuar menjëherë ndjesë pas ndeshjes. Rodgers tha për mediat në përfundim të takimit:
“Ai do të jetë një humbje e madhe për ne. Ishte një sfidë e tmerrshme dhe natyrisht jemi shumë të mërzitur. Skuadra mjekësore u hodh direkt në veprim dhe doktorët duhej që t’i vendosnin kyçin në vend përpara se ta dërgonin në spital. Këmba ishte aq e dëmtuar, sa nuk ishte e sigurtë që të ndërhyej menjëherë. Wesley do t’i nënshtrohet një skaneri tjetër për të parë se sa gjatë do të jetë jashtë fushave.”
Numri 1 i pankinës së Leicester gjithashtu foli për mundësinë e sjelljes së një tjetër mbrojtësi në skuadër. Jonny Evans është ende në rikuperim nga dëmtimi i marrë në finalen e FA Cup përballë Chelsea, dhe opsionet në mbrojtje janë të kufizuara. Gjithsesi, ka dhe lajme pozitive për “dhelprat”. James Maddison pritet të qëndrojë në klub, pavarësisht interesimit të Arsenal për mesfushorin. Lajmi u bë i ditur nga vet trajneri Rodgers i cili i dha fund spekullimeve.
