Fitorja e Manchester United me përmbysje, 3-2 përballë Atalantës në Champions League, ka prodhuar reagime të ndryshme. Trajneri Solskjaer tha se ekipi i tij “luajti mirë” në pjesën e parë. Ish-lojtari me famë i “Djajëve të Kuq”, Paul Scholes e cilësoi pjesën e parë përballë Atalantës si një “telash të madh”. Ndërsa Rio Ferdinand vlerësoi “intensitetin” e ekipit në fushë. Por cila do të jetë pamja e United ditën e diel, kur përballë do të kenë Liverpool-in e Jurgen Klopp?
Në momentet kur Solskjaer është më shumë në vështirësi, United ka prodhuar gjithmonë një rezultat pozitiv, i cili ka ulur më pas presionin rreth trajnerit. Dhe ky fenomen nuk ka ndodhur vetëm gjatë këtij sezoni.
Në tetor të 2019, pas 5 ndeshjesh pa fitore, Untied arriti të ndalë Liverpool-in e Jurgen Klopp duke dominuar gati totalisht takimin. Kjo ishte një arritje e madhe, duke marrë parasysh që të besuarit e Solskjaer ishin të vetmit që arritën t’i merrnin pikë “The Reds” në pjesën e parë të sezonit.
2 muaj më vonë, United kishte grumbulluar vetëm 1 fitore në 4 ndeshjet e fundit, por pas këtyre takimeve arriti të mposhtë Tottenham dhe Manchester City. Sezonin e kaluar, “Djajtë e Kuq” shfaqën të njejtat probleme në performancat e tyre, por gjithsesi ia dolën të fitonin përsëri përballë skuadrës së Pep Guardiolës.
Trajneri Solskjaer duket se e ka të qartë se çfarë duhet të përmirësojë në ndeshjen ndaj Liverpool:
“Duhet të mbrojmë më mirë në disa momente kyç, këtë e dimë. Është krijuar perceptimi se jemi inkonsistentë në performancat tona, ngaqë pësojmë shumë gola. Duhet ta eleminojmë edhe këtë problem.”
Në mënyrë të përgjithësuar, duket se problemet më të mëdha për United vijnë përballë ekipeve “të vogla”. Përballë rivalëve si Liverpool, Arsenal, apo City, “Djajtë e Kuq” mobilizohen mjaft mirë në fushë dhe japin 100% e tyre. Duke thënë këtë, problemi që Solskjaer duhet të zgjidhë në vijim mbetet mentaliteti dhe psikologjia e lojtarëve në fushën e blertë.
