Sipas raportimeve më të fundit, Frank Lampard ka hyrë në bisedime me klubin e Norwich, për t’u bërë trajneri i tyre i ri. Të ashtuquajturit “Kanarinat”, konfirmuan shkarkimin e trajnerit Daniel Farke, pas fitores së parë të klubit në kampionat, për këtë sezon. Triumfi ndaj Brentford nuk ishte mjaftueshëm për t’i shpëtuar punën trajnerit Farke.
Një burim nga klubi ka konfirmuar se diskutimet me Lampard janë në zhvillim e sipër, dhe trajneri dëshiron një rikthim në Premier League. 43 vjeçari është pa punë, që prej shkarkimit të tij nga Chelsea në muajin janar. Lampard fitoi 44 nga 84 ndeshje në krye të londinezëve, dhe aventura e tij me Chelsea, ishte eksperienca e tij e dytë si trajner i një klubi futbolli.
Përpara ardhjes tek Chelsea, Lampard ishte në krye të stolit tek Derby County. Nën drejtimin e tij, “The Rams” për pak sa nuk u promovuan në elitën e futbollit anglez. Por ekipi nuk pati fat në playoff-e. Pikërisht eksperienca e tij si menaxher në të dyja nivelet e futbollit anglez, si në Premier League, ashtu dhe në Championship, është ajo që i intereson më shumë Norwich.
Klubi gjendet në fund të renditjes së Premier League, dhe objektivi për këtë sezon është mëse i qartë, mbijetesa. “Kanarinat” gjenden 5 pikë larg zonës së sigurisë, pas 11 ndeshjesh në kampionat. Asnjë skuadër tjetër në Premier League nuk ka pësuar më shumë gola se Norwich këtë sezon, plot 26.
Pas shkarkimit të trajnerit Farke, drejtori sportive i klubit pranoi se Norwich ka një rrugë të gjatë për të bërë:
“Ne e dimë se kemi aftësinë si skuadër për të marrë pikë dhe për t’u ngjitur lart në renditje. Kemi dhe 27 ndeshje për të luajtur në këtë sezon dhe rruga është e gjatë.”