Trajneri i Manchester United, Ole Gunnar Solskjaer, ka nënshkruar një kontratë të re me klubin, duke firmosur me “Djajtë e Kuq” një marrëveshje deri në vitin 2024. Norvegjezi, i cili u vendos në krye të klubit përkohësisht në 2019, pas largimit të Jose Mourinho, shumë shpejt e gjeti veten si trajner me kohë të plotë tek United.
Sezonin e kaluar, 48 vjeçari arriti të çonte United në finalen e Europa League, të cilën fatkeqësisht nuk mundën dot ta fitonin. Gjithashtu, “Djajtë e Kuq” e mbyllën Premier League në vendin e dytë, duke dhënë kështu sinjale mjaft pozitive për një epokë të re, pas zhgënjimeve të njëpasnjëshme të viteve të fundit. Vet Solskjaer u shfaq mjaft i kënaqur për kontratën e re, ai u shpreh:
“Të gjithë e dinë se çfarë ndiej unë për këtë klub. Është një moment mjaft i mirë për Manchester United. Kemi ndërtuar një ekip me balancën e duhur mes lojtarëve të rinj, dhe atyre me eksperiencë, të cilët janë të uritur për trofe. Kam rreth meje një ekip fantastik, i cili është gati të hedhë hapin e rradhës në udhëtimin tonë.”
Kujtojmë se si lojtar, Solskjaer kaloi plot 11 sezone te Manchester United. Ai madje shënoi dhe golin që i dha “Djajëve të Kuq” fitoren në finalen e vitit 1999 në Champions League.
Nën-drejtori ekzekutiv i United, Ed Woodward, gjithashtu komentoi rinovimin e kontratës me Solskjaer. Sipas tij, drejtuesit e klubit janë gjithnjë e më të bindur se me trajnerin norvegjez, skuadra po shkon në drejtimin e duhur. Woodward deklaroi:
“Ole dhe stafi i tij kanë punuar në mënyrë të palodhur, për të vendosur themelet për suksesin afatgjatë në fushën e blertë. Rezultatet e kësaj pune janë bërë gjithnjë e më të dukshme në 2 sezonet e fundit, dhe mezi presim të shohim se si do të zhvillohet skuadra në vitet e ardhshme.”
