Drejtori teknik i Milan, Paolo Maldini, ka qetësuar fansat kuqezinj, duke hedhur dritë mbi thashethemet për të ardhmen e Rafael Leao. Gjatë merkatos verore, u përfol se Chelsea ishte i interesuar për shërbimet e portugezit, pasi ky i fundit u paraqit mjaft mirë sezonin e kaluar, duke regjistruar 11 gola dhe 8 asiste. Klubi londinez nuk ia doli të siguronte kartonin e sulmuesit në verë, ndërkohë që Leao po vazhdon me paraqitjet e mira, teksa ka shënuar 6 gola në 6 ndeshje të Serie A këtë sezon.
Mediat angleze kanë raportuar se Chelsea vazhdon të jetë i interesuar për Rafael Leao, por Paolo Maldini ka konfirmuar se portugezi dëshiron të qëndrojë në Itali. Sulmuesi nuk ka firmosur dot një rinovim kontrate me kuqezinjtë, për shkak të një konflikti ligjor me ish-klubin e tij, Sporting CP, për lëvizjen e lojtarit drejt Lille. Maldini u shpreh së fundmi për CalcioMercato:
“Leao ka një situatë të vështirë që lidhet me lëvizjen e tij të mëparshme drejt Lille, e cila po e afekton shumë atë dhe ka bërë që situata të ndryshojë shpesh herë. Por Rafa është mirënjohës për ne dhe unë jam i interesuar për atë që na thotë. Ai e kupton se rruga e tij në vitet e ardhshme duhet të jetë tek Milan, dhe na ka thënë të njejtën gjë. Do të ketë negociata, por ne e dimë se lojtarët e mirë duhet të paguhen sipas vlerës së tyre. Nëse skuadra rritet më tej, Leao do të ketë gjithçka për të konkurruar në nivelet më të larta.”
Maldini shtoi:
“Sigurisht, nuk ka lojtarë të patransferueshëm, në asnjë skuadër në botë.”
Mediat italiane bëjnë me dije se Milan i ka bërë të qartë drejtuesëve të Chelsea, se blutë duhet të paguajnë 150 milionë euro, për të aktivizuar klauzolën e prishjes së kontratës së Leao.