Mesfushori francez Paul Pogba duket se është në një moment të vështirë tek Manchester United. Lojtari nuk e ka “përtypur” mirë faktin se nuk ishte pjesë e formacionit titullar ndaj Liverpool, dhe humbja 5-0 vetëm sa i ka përkeqësuar gjërat.
Ishte Pogba që humbi topin në aksionin ku Liverpool shënoi golin e 5, dhe si të mos mjaftonte kjo, mesfushori u ndëshkua më vonë me karton të kuq, pas ndërhyrjes agresive ndaj Naby Keita. Francezi i kërkoi falje shokëve të skuadrës pas ndeshjes, por nuk komunikoi me trajnerin Solskjaer, i cili sipas raportimeve ka humbur mbështetjen e lojtarëve të rëndësishëm në dhomat e zhveshjes.
Duke marrë shkas nga situata, 28 vjeçari ka ndalur të gjitha bisedimet për rinovim kontrate me “Djajtë e Kuq”. Kontrata e futbollistit me United skadon në verën e ardhshme, që do të thotë se lojtari mund të largohet me kosto zero nga klubi. Duket se Pogba po vuan “ndëshkimin” e Solskjaer, pas komenteve që futbollisti bëri pas humbjes 4-2 ndaj Leicester. Paul tha:
“Kemi pasur të tilla paraqitje për një kohë të gjatë. Nuk e kemi gjetur problemin, po pësojmë gola shumë lehtë. Duhet të jemi më të maturuar, të tregojmë më shumë eksperiencë, dhe të luajmë me arrogancë, në kuptimin e mirë të fjalës. Duhet të gjejmë diçka, duhet të ndryshojmë.”
Trajneri i mëparshëm i “Djajëve të Kuq”, Jose Mourinho, gjithashtu kishte një marrëdhënie shpesh herë të tensionuar me francezin. Kjo gjë mendohet se kontribuoi si një arsye shtesë për shkarkimin e tij.
Ndërsa në këto momente, është Solskjaer që ka humbur besimin e shumë prej lojtarëve të tij, duke bërë që e ardhmja e norvegjezit në krye të stolit të United, të jetë në fije të perit. Sipas portaleve angleze, bordi drejtues i ka lënë Solskjaer si afat, 3 ndeshjet e ardhshme të United, për të treguar se ai e meriton të jetë në krye të ekipit.
