Megjithëse nuk kishte shumë arsye për t’i kërkuar ndjesë fansave, Paul Pogba u është drejtuar tifozëve me një postim, pas eleminimit të Francës nga Euro 2020. Mesfushori i cili u vlerësua nga opinioni publik, si lojtari më i mirë i “gjelave” në Euro, në një postim në Instagram foli për natyrën e futbollit. Pogba shkruan:
“Ndonjëherë natyra e futbollit është mizore… mizore dhe e bukur. Loja na solli trishtim, por lumturi kundërshtarëve tanë. Kjo është bukuria e futbollit. Sigurisht, të gjithë dëshironim një rezultat pozitiv. Falenderoj shumë fansat tanë në të gjithë globin. Ishte fantastike t’ju dëgjoje, shikoje dhe festoje me ju. Na dhatë shpresë dhe gëzim përgjatë të gjitha lojërave. Do ta mbajmë kokën lart dhe do të kthehemi më të fortë.”
Franca ishte kombëtarja favorite për të fituar trofeun e Europianit. Eleminimi i tyre ka hapur kështu garën për të gjitha kombëtaret e tjera, të cilat do të tentojnë t’i shkojnë deri në fund kompeticionit prestigjoz.
I shpejtë ka qenë reagimi i Luke Shaw, shokut të skuadrës së Pogba tek Manchester United. Shaw komentoi tek postimi i francezit:
“Mbaje kokën lart mik, je më i miri.”
Pogba do të marrë tani pushimet, për t’u rikthyer tek Manchester United në mes të korrikut, për përgatitjet e sezonit të ri. Ndërkohë zërat për një transferim të tij jashtë Anglisë ende janë të forta, ashtu siç kanë qenë në çdo merkato verore. Gjithsesi, skenari më i mundshëm për mesfushorin mbetet rinovimi i kontratës me “Djajtë e Kuq”.
Kylian Mbappe gjithashtu postoi një status emocional në Instagram, duke u kërkuar ndjesë tifozëve për penalltinë e humbur, e cila i kushtoi shumë skuadrës së tij. Talenti i PSG tha se do ta ketë të vështirë të flejë gjumë këto ditë, por do të rikthehet akoma dhe më i fortë. Si Pogba, ashtu dhe Mbappe, nuk harruan të urojnë Zvicrën për kualifikimin në Euro.