Anglia e Gareth Southgate do të përballet me Danimarkën ditën e mërkurë në Wembley, dhe është vetëm 1 hap larg finales së madhe të Euro 2020. Ndër ata që besojnë fort tek “3 Luanët” është dhe trajneri i Manchester City, Pep Guardiola. Pep mendon se Anglia është në duar të sigurta për dekadën e ardhshme, falë talenteve të reja dhe punës fantastike të Southgate.
Guardiola, i cili momentalisht po kalon pushimet e tij në Spanjë, në një intervistë për TV3, u shpreh mjaft optimist për të ardhmen e kombëtares angleze. Sipas spanjollit, përfaqësuesja është e kompletuar mjaft mirë në repartin e mesfushës dhe atë të sulmit. Trajneri gjithashtu komentoi mbi skuadrat e tjera, dhe preferencat e tij personale:
“Më pëlqen fakti që skuadrat të cilat rrezikojnë më shumë kanë ecur më tej në Europian. Italia është njëra prej tyre, Spanja po ashtu.
Ata (Spanja) luajnë duke ndërtuar lojën nga prapa dhe jam shumë i lumtur me Luis Enrique dhe atë që ai po bën. Danimarka gjithashtu luan shumë mirë, ndërsa Anglia ka talent të jashtëzakonshëm në mesfushë dhe sulm, për të paktën 10 vitet e ardhshme.”
Shumë prej lojtarëve të drejtuar nga Guardiola te Manchester City kanë rezultuar pika mjaft të rëndësishme për Anglinë në Europian. Raheem Sterling është vetëm 1 prej tyre. Anësori ka shënuar 3 gola deri më tani, 2 prej të cilëve kanë qenë vendimtarë për fatin e ndeshjeve. John Stones gjithashtu ka dhuruar performanca mjaft solide në qendër të mbrojtjes. Kyle Walker po ashtu ka fituar besimin e Southgate, duke u kthyer në një pikë ekuilibri në formacionin e “3 Luanëve”.
Ndryshe është situata me Phil Foden, i cili nuk është aktivizuar me Anglinë që prej barazimit pa gola me Skocinë. Shancet që mesfushori të zbresë në fushë si titullar përballë Danimarkës, apo në finalen e mundshme janë të pakëta. Kjo pasi duket se Anglia e ka gjetur tashmë formulën e suksesit në Euro.
