Trajneri i Manchester City, Pep Guardiola, duket se është lodhur nga akuzat e vazhdueshme se klubi i tij ka thyer rregullat e “fair-play”-it financiar, me transferimet e kësaj merkatoje. Spanjolli ka sfiduar zërat kritikë duke u kërkuar atyre që të argumentojnë me prova, se si “qytetarët” po thyejnë rregullat e vendosur nga UEFA. Këto akuza kanë ndjekur gjithmonë “qytetarët”, por ato u shtuan akoma më shumë pas afrimit në klub të Jack Grealish, për shumën rekord prej 100 milionë paundësh. Pep deklaroi mbi situatën:
“Ne kemi limitet tona për shkak të FFP (UEFA Financial Fair Play Regulations). Jemi në të njejtën linjë si të gjithë klubet e tjera. Klubet vendosin vet se çfarë duan të bëjnë me paratë e tyre. Çdo sezon kemi kaluar me sukses kontrollet që janë në fuqi për të gjitha ekipet. Nëse po bëjmë diçka gabim, atëherë provojeni!”
Guardiola është i besimit se kritikat mbi shpenzimet e klubit të tij, janë të nxitura nga pronarë të klubeve rivale, të cilët nuk janë të gatshëm të investojnë në të njejtin nivel për skuadrën e tyre. Spanjolli shtoi:
“E kam thënë dhe më përpara, ka pronarë që i duan të gjitha përfitimet për vete. Pronarët tanë nuk duan të humbasin para, por nuk e kanë problem të shpenzojnë. Në të kaluarën Manchester United fitoi shumë tituj pasi shpenzoi më shumë para se klubet e tjera. E mbani mend?
Më përpara ishin 1 ose 2 klube, tani ka dhe të tjera të cilat duan të bëhen pjesë e lojës. Ku qëndron problemi?”
Guardiola gjithashtu ka kundërshtuar idenë se shpenzimet e mëdha nga klube të caktuara dëmtojnë konkurencën dhe garën e drejtë mes ekipeve. Spanjolli përdori shembullin e Barcelonës që drejtonte vet. Sipas tij, katalanasit arritën majat e suksesit europianë me lojtarë të akademisë, pra me kosto zero. Numri 1 i pankinës së City mbrojti kështu idenë se çdo klub ka filozofinë e tij të të luajturit futboll.
