Marcos Leonardo është talenti i Santos që ka tërhequr vëmendjen e shumë klubeve europiane, mes tyre dhe të gjigandëve anglezë të Premier League, Arsenal dhe Manchester United. Braziliani 20 vjecar duket se është gati të hedhë hapin e madh në karrierën e tij, për t’u transferuar tek një nga ligat e mëdha të Europës. United dhe Arsenal mbeten ekipet favorite për të firmosur me sulmuesin, por Roma dhe Newcastle gjithashtu pritet të hidhen në garë.
Leonardo ka shënuar plot 17 gola për Santos deri më tani gjatë këtij sezoni. Ofertat për lojtarin nuk munguan edhe gjatë merkatos së kaluar, por Marcos vendosi të qëndrojë në Sao Paulo edhe për një sezon. Megjithatë, largimi i tij duket tashmë i pashmangshëm, dhe mund të ndodhë që në merkaton e janarit.
Kjo është konfirmuar dhe nga agjentja e lojtarit, Rafaela Pimenta. Ajo u shpreh:
“Që në merkaton e kaluar ai kishte mundësinë të shitej, por situata sportive tek Santos ishte shumë specifike. Ai pranoi të qëndronte sepse donte të ndihmonte ekipin deri në fund të kampionatit. Nuk donte të largohej pasi nuk ishte gjëja e duhur. Por tani ka ardhur koha. Ai kërkon një eksperiencë europiane dhe koha e tij do të vijë këtë dimër.”
Arsenal është në kërkim të një sulmuesi për shkak dhe të dëmtimeve të shpeshta të Gabriel Jesus. Kjo mund t’i shtyjë më seriozisht londinezët në garën për kartonin e Marcos, por Mikel Arteta gjithashtu kërkon të përforcojë mesfushën. Mbetet për t’u parë se cili do të jetë prioriteti i Arsenal gjatë merkatos së janarit. Nga ana tjetër, Manchester United gjithashtu ka nevojë për emra më të besueshëm në sulm, pasi reparti ofensiv i “Djajëve të Kuq” ka prodhuar rezultate shumë të dobëta deri më tani.
Ndërkohë nga vet Marcos Leonardo, ende nuk ka informacione mbi preferencat e tij për kampionatin e preferuar europian ku do të luajë.