Drejtuesit e Arsenal vazhdojnë të jenë të interesuar në shërbimet e Douglas Luiz. Talenti brazilian aktivizohet me Aston Villa, dhe Arsenal dështoi të bënte të vetin lojtarin gjatë merkatos së vitit të kaluar. Megjithatë, duket se londinezët do të hidhen sërish në sulm për kartonin e mesfushorit.
Trajneri Arteta është në kërkim të një tjetër përforcimi në mesfushë, pas transferimit të bujshëm të Declan Rice nga West Ham United. Klubi po vlerëson opsione nga ligat europiane, por dhe në Amerikën Latine, dhe duket se Douglas Luiz mbetet alternativa më tërheqëse për momentin.
Performancat e këtij të fundit kanë patur rritje të dukshme nën drejtimin e trajnerit Unai Emery. Luiz shënoi dy gola në fitoren 4-1 që Aston Villa arriti ndaj West Ham në fundjavë. Kjo ishte ndeshja e gjashtë rradhazi në shtëpi, që Douglas gjen rrugën e rrjetës për klubin e tij.
Mikel Arteta e njeh nga afër mesfushorin, duke qënë se Luiz ishte pjesë e Manchester City për dy vite, por nuk arriti të luante për shkak të problemeve me vizën e punës. Tekniku spanjoll duket se nuk e ka hequr asnjëherë vemendjen prej lojtarit, por transferimi i Luiz në Emirates do të jetë i vështirë.
Sipas mediave angleze, Villa nuk do të pranojë oferta në janar për talentin brazilian. Vet Douglas duket se për momentin është i fokusuar tek Villa, dhe dëshiron të ndihmojë klubin për t’u kualifikuar në Champions League. Të besuarit e Unai Emery kanë grumbulluar 19 pikë nga 9 ndeshjet e para në kampionat, dhe ndodhen në vendin e pestë në renditjen e përgjithshme.
Aston Villa gjithashtu luan në Europa Conference League, dhe është një nga ekipet favorite për t’i shkuar deri në fund kompeticionit prestigjoz. Kjo do të thotë se Douglas ka shans real për të fituar trofe me klubin e tij aktual, dhe nuk do ta humbasë këtë mundësi.
