Mediat angleze kanë bërë me dije se drejtuesit e Arsenal janë gati të lënë të lirë Eddie Nketiah. 24 vjecari i talentuar është linkuar prej kohësh me ekipe rivale në Premier League si West Ham, Crystal Palace apo Brentford, dhe duket se Arsenal është tashmë gati të pranojë oferta për kartonin e Nketiah.
Drejtuesit e klubit londinez e dinë tashmë se duhet të shesin lojtarë, për të siguruar financat e duhura për të realizuar blerje të mëdha, dhe Nketiah duket se nuk është më në planet e trajnerit Arteta. Londinezët kërkojnë rreth 40 milionë paundë për kartonin e lojtarit sipas Football Insider, dhe West Ham kryeson momentalisht listën e klubeve të interesuara për futbollistin e talentuar.
Arsenal ndërkohë nuk preferon që të heqë dorë prej lojtarit që në merkaton e janarit. Megjithatë, burime pranë klubit kanë bërë me dije se londinezët nuk do të ngurrojnë të japin dritën jeshile nëse oferta e duhur troket në derë.
Eddie Nketiah nuk ka mundur të sigurojë një vend titullari në ekipin e trajnerit Arteta, teksa lojtari është aktivizuar shpesh herë si zëvëndësues i Gabriel Jesus. Pavarësisht minutave të limituara në fushën e blertë, Nketiah nuk ka zhgënjyer asnjëherë fansat e Arsenal, dhe ka qënë disa herë mjaft deciziv me golat e tij për “The Gunners”. Këtë sezon lojtari ka shënuar 6 gola si dhe 4 asiste në 23 paraqitje gjithsej. Dëmtimi i Gabriel Jesus në fillim të sezonit i dha më shumë mundësi Nketiah për të shfaqur talentin, dhe paraqitjet e mira bënë që dhe vlera e kartonit të tij të rritej.
Momentalisht, lojtari ka një kontratë të vlefshme deri në vitin 2027 me Arsenal. Kjo pasi Nketiah firmosi një rinovim kontrate vitin e kaluar. Mbetet të shohim tashmë se cili do të jetë destinacioni i rradhës i talentit të Arsenal.