Drejtuesit e Arsenal kanë shprehur interesin e tyre për mbrojtësin e talentuar të AC Milan, Fikayo Tomori. Trajneri Mikel Arteta ka piketuar Tomori si një alternativë të mirë për prapavijën e Arsenal, që për shkak të situatës me dëmtimet, ka nevojë për përforcime. Lojtari është një nga performuesit më të spikatuar tek Milan në Serie A, që kur u bë pjesë e klubit në vitin 2021. Interesi i Arsenal gjithsesi mbetet në fazat e para.
Megjithatë, Milan nuk do ta lërë Tomori të largohet lehtësisht duke marrë parasysh rëndësinë e tij në San Siro. Mbrojtësi ka tërhequr gjithashtu vëmendjen e Bayern Munich teksa kampionët gjermanë gjithashtu janë në kërkim të përforcimeve në mbrojtje.
Një avantazh që Arsenal ka mbi Bayern Munich është fakti se familja e Tomori është një adhuruese e Arsenal. Për më shumë, vet lojtari i preferuar i mbrojtësit ka qënë legjenda e Arsenal, Thierry Henry. Tomori shprehu admirimin e tij për francezin gjatë një interviste vitin e kaluar.
Arsenal kërkon të sjellë një mbrojtës në Emirates, dhe për shkak të largimeve potenciale në merkaton e janarit. Një nga emrat që mund të largohet është ai i mbrojtësit polak Jakub Kiwior. Lojtari erdhi tek Arsenal nga italianët e Spezia por nuk ia ka dalë të sigurojë vendin e tij në ekipin e trajnerit Arteta. Për më shumë, mbrojtësi prej kohësh është përfolur për një rikthim të mundshëm në Itali.
Ndërkohë përsa i përket Tomori, kontrata e tij aktuale me Milan skadon në vitin 2027. Kjo do të thotë se Milan nuk ka nevojë të nxitohet për të shitur kartonin e tij. Tomori është aktivizuar 22 herë me Milan këtë sezon, pavarësisht një dëmtimi në kofshë. Profili i lojtarit gjithashtu i përshtatet futbollit në Premier League, duke marrë parasysh atributet e tij të forta fizike.