Drejtuesit e Arsenal pritet të hidhen në sulm për të siguruar shërbimet e Douglas Luiz, në merkaton e verës. Klubi londinez ka bërë disa oferta në të kaluarën për mesfushorin, por ato janë refuzuar nga Aston Villa. Megjithatë, mediat angleze kanë bërë me dije se Mikel Arteta është i vendosur për të sjellë në Emirates talentin brazilian.
E ardhmja e Jorginho dhe Thomas Partey është ende e paqartë, pasi kontratat e tyre me Arsenal përfundojnë në vitin 2024 dhe 2025. Kjo do të thotë se reparti i mesfushës do të ketë më shumë hapësira të lira, sidomos duke marrë parasysh dhe largimin e mundshëm të Mohammed Elneny në verë.
Luiz ka zhvilluar 46 paraqitje në të gjitha kompeticionet këtë sezon, duke shënuar 10 gola si dhe 10 asiste. Kontrata e tij aktuale me Aston Villa skadon në vitin 2026, dhe drejtuesit e klubit pritet të bëjnë maksimumin që mesfushori të mos largohet. Barcelona gjithashtu besohet se është e interesuar për brazilianin. Megjithatë, nga spanjollët nuk ka ende një ofertë konkrete apo bisedime mes tyre dhe Aston Villa. Vet lojtari gjithashtu mendohet se preferon të qëndrojë në Premier League, sipas burimeve të afërta pranë tij.
Arsenal ndërkohë është në kërkim dhe të një sulmuesi për sezonin e ardhshëm. Së fundmi, vëmendja e drejtuesëve të klubit është përqëndruar tek ylli i Bournemouth, Dominic Solanke. Lojtari ka shënuar plot 19 gola këtë sezon, në 36 paraqitje në të gjitha kompeticionet me klubin e tij. Solanke ka tërhequr vëmendjen e shumë klubeve në Premier League, përfshirë këtu West Ham dhe Tottenham. Sulmuesi kërkon të jetë pjesë e kombëtares angleze në europianin e këtij viti në Gjermani, dhe paraqitjet e tij fantastike në Premier League mund t’i ofrojnë një vend në skuadrën e drejtuar nga Gareth Southgate.