Drejtuesit e Arsenal janë duke monitoruar talentin e Nottingham Forest, Morgan Gibbs-White. Mesfushori me tipare ofensive ka impresionuar me paraqitjet e tij këtë sezon, dhe bordi i Forest është i prirur të presë oferta për lojtarin në merkaton e verës, nisur dhe nga situata e vështirë ekonomike e klubit, së fundmi. Kujtojmë se Nottingham Forest u dënua nga Premier League me heqjen e 4 pikëve, pasi klubi pati tejkaluar normat financiare për humbjet vjetore. Kjo do të thotë se largimet në merkaton e verës janë të pashmangshme.
Trajneri Mikel Arteta ka opsione të mjaftueshme në sulm, por duket se spanjolli do të vazhdojë të kërkojë profile të ngjashme me lojtarët e tij aktualë, në merkaton e ardhshme. Gibbs-White është një lojtar mjaft i gjithanshëm, i cili mund të mbushë hapësirat e lëna në reparte të ndryshme të fushës. Gibbs-White është 24 vjec dhe ka zhvilluar 28 paraqitje në Premier League këtë sezon.
Lojtari iu bashkua Nottingham Forest nga Wolves në vitin 2022. Ndërkohë, mendohet se Arsenal është gjithashtu në preferencat personale të Morgan. Para pak kohësh, mesfushori vlerësoi aftësitë dhe paraqitjet e Bukayo Saka, duke i thurrur elozhe anglezit. Gibbs-White u shpreh:
“Bukayo për mua është një nga lojtarët më të mirë në botë për momentin. Mendoj që Bukayo nuk del jashtë zonës së tij të komfortit, pasi ai e di mjaft mirë se cila është aftësia e tij më e mirë. Ai e ka zotëruar atë dhe funksionon çdo herë, ai futet brenda në krahun e majtë, dhe bum, shënon gol. Ai duket se e praktikon atë çdo ditë në stërvitje.”
Fansat e Arsenal shpresojnë të shohin Saka dhe Gibbs-White së bashku në fushën e blertë sezonin e ardhshëm. Megjithatë, kjo do të varet mes të tjerash dhe nga lëvizjet e tjera që klubi londinez do të bëjë në merkato.
