Arsenal ka regjistruar një fitore mjaft të rëndësishme ndaj Aston Villa në Premier League, duke triumfuar me rezultatin 4-2 në minutat e fundit të sfidës. Ndeshja ishte një sporvë e vërtetë karakteri për të besuarit e Mikel Artetës, të cilët u mposhtën nga rivalët për titull të Manchester City me rezultatin 3-1 para pak ditësh.
Takimi filloi mjaft shpejt, teksa Villa shënoi golin e parë që në minutën e 5’, duke kapur në befasi miqtë në një kundërsulm të shpejtë. Ishte pikërisht Watkins ai që hapi serinë e golave, duke shënuar golin e tij të katërt personal në po kaq ndeshje. Megjithatë, përgjigja e Arsenal ishte mjaft e shpejtë. Vetëm 10 minuta më vonë, Saka shënoi me një goditje të fortë pranë portës, duke vendosur baraspeshën në fushë.
Por Villa tregoi se goli i parë nuk ishte rastësi, teksa pas një aksioni mjaft të bukur, braziliani Coutinho kaloi përsëri në avantazh të zotët e shtëpisë me një goditje të pastër brenda zonës. Pjesa e parë u mbyll me shifrat 2-1 në favor të Villa, por mesa duket kjo nuk e demotivoi aspak Arsenal.
Të besuarit e Mikel Artetës zbritën në fushë me besim dhe vendosmëri për të përmbysur rezultatin. Përpjekjet e miqëve u shpërblyen eventualisht në minutën e 60’ të sfidës, kur Zinchenko shënoi golin e tij të parë për Arsenal.
Në minutat e fundit të ndeshjes u duk se gjithçka do të mbyllej në barazim, por në të 93’, goditja e Jorginho u devijua nga portieri i Villa, Emi Martinez në portën e vet, duke i dhënë kështu Arsenal një gol mjaft të rëndësishëm. Teksa të zotët e shtëpisë u munduan të gjenin golin e barazimit, Gabriel Martinelli kapi të papërgatitur mbrojtjen e Villa, duke vrapuar i vetëm drejt portës dhe duke shënuar dhe golin e katërt për Arsenal.
Ekipi i Mikel Artetës siguroi kështu një fitore tejet të rëndësishme në garën për titull kampion.