Aston Villa siguroi fitoren e dytë për këtë sezon në Premier League, teksa të besuarit e Steven Gerrard triumfuan minimalisht 1-0 përballë Southampton. Tekniku anglez tha se të tijët reaguan mjaft mirë ndaj kritikave që kanë marrë javët e fundit, pavarësisht fitores së arritur me mjaft vështirësi. Gerrard u shpreh në përfundim të takimit:
“Nuk ishte një fitore me shumë stil, por me pozicionin ku gjendeshim në kampionat, e dinim se duhej të luanim në mënyrë pragmatike. Jam shumë krenar për përpjekjen, aplikimin në fushë, dhe vullnetin e djemëve. Luajtëm më mirë sesa herën e kaluar. Në futboll duhet të shtrëngohesh, të luftosh dhe të kesh vullnet, dhe ne luajtëm fort sot. Do të përmirësohemi përsa i përket stilit të lojës dhe mbajtjes së topit, ajo do të vijë, por sot ishin të rëndësishme 3 pikët.”
Ish-lojtari i Liverpool shtoi:
“Duhej të provonim se performance jonë përballë Manchester City nuk ishte rastësi, dhe kishte shumë persona që po na ndiqnin nga televizoni, por ia dolëm.”
Ndërkohë nga ana tjetër, Fulham arriti të rrëmbejë një fitore spektakolare më përmbysje përballë Nottingham Forest, në shifrat 3-2. Ishin të zotët e shtëpisë ata që kaluan në avantazh që në minutën e 11’ të takimit me Awoniyi. Pjesa e parë e sfidës u mbyll me avantazhin e Forest, por e dyta do të rezervonte një paraqitje spektakolare të lojtarëve të Fuham.
Në minutën e 54’ ishte Tosin Adarabioyo që me një gol me kokë vendosi baraspeshën në fushë. Vetëm 3 minuta më vonë, Joao Palhinha shënoi golin e dytë për Fulham me një goditje spektakolare, teksa Nottingham Forest u godit qartësisht nga goli i parë i miqëve. Në minutën e 60’ Harrison Reed shënoi të tretin për të besuarit e Marco Silva. Pavarësisht se O’Brien shënoi golin e dytë për Forest në minutën e 77’, Fulham ia doli të ruante rezultatin duke u larguar me 3 pikë nga City Ground.