Manchester City është mposhtur 2-1 nga Brentford në Etihad, duke humbur kështu 3 pikë mjaft të vlefshme në garën për titull kampion. Sulmuesi i Brentford, Ivan Toney, ishte autori i 2 golave për ekipin e tij, duke bërë kështu të pavlefshëm golin e Foden për City. Toney nuk u përfshi nga trajneri Southgate në listën e kombëtares angleze për Kupën e Botës, dhe 2 golëshi ishte një përgjigje perfekte e sulmuesit për të gjithë kritikët e tij.
Toney kaloi në avantazh Brentford në minutën e 16’ të takimit, teksa edhe para golit të parë, pati një mundësi mjaft të mirë për të shënuar, por u ndal nga portieri Ederson. Phil Foden barazoi rezultatin për “qytetarët” vetëm pak momente para fundit të pjesës së parë, me një goditje mjaft të bukur me të majtën. Gjithsesi, goli i City nuk ndikoi aspak në lojën e miqëve, të cilët vazhduan të ndjekin të njejtin plan, duke mos ndalur asnjëherë sulmet në portën e ekipit të Guardiolës.
Në pjesën e dytë të takimit City rriti tempin e lojës, në përpjekje për të gjetur golin e avantazhit. Ilkay Gundogan humbi një rast të shkëlqyer për të shënuar, por gjithsesi, Brentford gjithashtu ishte mjaft i rrezikshëm me anë të kundërsulmeve. Në dy raste të caktuara ishte portieri Ederson ai që shpëtoi City-n nga goli i rradhës, ku protagonist ishte përsëri Toney.
Por ishte thjesht çështje kohe përpara se sulmuesi të gjente përsëri rrjetën. Aymeric Laporte pësoi një dëmtim në kokë, gjë që detyroi gjyqatarin e katërt të akordonte plot 10 minuta shtesë në fund, si pasojë e situatës. Në minutën e 98’ të sfidës City u ndëshkua nga një kundërsulm i miqëve, teksa Toney dërgoi në rrjetë krosimin e Josh Dasilva. “Bletët” siguruarn kështu një fitore mëse të merituar në Etihad.
