Drejtuesit e Chelsea duket se janë të interesuar për talentin irlandez të Brighton, Evan Ferguson. Mediat angleze kanë zbuluar se Chelsea është prej kohësh admirues i 19 vjecarit, kjo dhe për faktin se i përshtatet vizionit të klubit për të ardhmen. Megjithatë, transferimi i sulmuesit në Stamford Bridge nuk do të jetë aspak i lehtë.
Ferguson sapo ka firmosur një kontratë të re me Brighton, të vlefshme deri në vitin 2029. Kjo do të thotë se kostot për një transferim të mundshëm do të jenë shumë të larta për Chelsea. Brighton gjithashtu nuk dëshiron të humbasë kaq shpejt talentin e tyre premtues, duket ditur se mund të përfitojnë akoma më shumë financiarisht nëse lojtari performon mirë në të ardhmen. Kujtojmë se Chelsea i pagoi Brighton plot 115 milionë paundë verën e kaluar, për kartonin e Moises Caicedo.
Një tjetër arsye se përse Ferguson do të ishte lojtari perfekt në këtë moment për Chelsea është dhe aspekti financiar. Blutë e Londrës kanë mundësi të kufizuara për të operuar në merkaton e janarit, për shkak të shpenzimeve të kaluara. Kjo do të thotë se Chelsea nuk mund të firmosë me sulmues si Victor Osimhen apo Ivan Toney, pasi do të duhej t’u ofronte atyre një pagë mjaft të lartë, për momentin jashtë mundësive. Ferguson nga ana tjetër mund t’i bashkohet bluve duke pranuar një pagë më të ulët.
Megjithatë, drejtuesit e Brighton janë skeptikë për të humbur një tjetër talent. Verën e kaluar, Ferguson mori vëmendje dhe nga Manchester United e Tottenham. Këtë të fundit donin të zëvëndësonin Harry Kane, i cili u largua drejt Bayern Munich. Megjithatë, asgjë nuk u konkretizua dhe për momentin duket se vetëm Chelsea mbetet i interesuar seriozisht për kartonin e irlandezit. Sipas të gjitha gjasave, mundësitë kryesore për të realizuar operacionin janë në merkaton e verës.