Chelsea ka kompletuar transferimin rekord të talentit Enzo Fernandez nga Benfica, në ditën e fundit të merkatos. Blutë e Londrës do t’i paguajnë klubit portugez plot 107 milionë paundë për kartonin e mesfushorit. Lëvizja ka thyer rekordin e mëparshëm për lojtarin më të shtrenjtë në Premier League, që mbahej nga Jack Grealish i Manchester City. “Qytetarët” paguan 100 milionë paundë për anglezin.
Fernandez iu bashkua Benfica nga ekipi argjentinas i River Plate për vetëm 10 milionë paundë. Gjithsesi, Kupa e Botës në Katar tregoi potencialin dhe aftësitë e jashtëzakonshme të mesfushorit, i cili mori dhe titullin e lojtarit të ri më të mirë të kompeticionit. Fernandez ka firmosur një kontratë për 8 vite e gjysmë me Chelsea.
Transferimi i argjentinasit do të thotë se klubi londinez ka shpenzuar plot 289 milionë paundë këtë merkato janari, një shifër e pazakontë. Sidomos duke marrë parasysh se blutë shpenzuan dhe 270 milionë paundë në merkaton e verës.
Benfica konfirmoi se River Plate do të përfitojë 25% të shumës së transferimit të Fernandez, për shkak të një kushti të paracaktuar në klauzolën e lojtarit. Mesfushori ka shënuar 4 gola në 29 paraqitje me klubin portugez. Fernandez gjithashtu shënoi në botërorin e Katarit, në ndeshjen e fazës në grupe përballë Meksikës.
Gazetari sportiv Guillem Balague, ka komentuar transferimin e portugezit te Chelsea, duke e cilësuar atë si një lotjar mjaft të talentuar dhe të zgjuar. Balague u shpreh:
“Ai nuk ishte vendimtar në fillimin e botërorit, por shumë i rëndësishëm për fitoren e Argjentinës. Gjithçka u var nga leximi i tij i lojës… Ai mund të luajë në çdo pozicion në mesfushë. Mund të jetë një stopues, mund të luajë në të majtë, në të djathtë, dhe statistikat tregojnë që ai rrit kualitetin e lojës me lëvizjet e tij. Ai jep pasin e fundit dhe pasin përpara tij, dhe gjithashtu ka shënuar gola. Nuk është e lehtë të gjesh një lojtar që kur loja luhet me intensitet të lartë, përsëri të luajë futboll të bukur.”
