Drejtuesit e Chelsea po konsiderojnë të hidhen në sulm për portierin e Arsenal, Aaron Ramsdale, pas dëmtimit të numrit 1 të portës, Robert Sanchez. Ky i fundit pritet të jetë jashtë fushave për një periudhë kohore, për shkak të një dëmtimi në gju. Ramsdale nga ana tjetër pritet të largohet nga Arsenal, pasi e ka humbur tashmë vendin e titullarit tek ekipi i trajenerit Mikel Arteta. Megjithatë, ende nuk dihet nëse drejtuesit e klubit janë të gatshëm të heqin dorë prej tij që në janar.
Newcastle gjithashtu është duke monitoruar situatën e Ramsdale tek Arsenal. Megjithatë, klubi momentalisht nuk zotëron financat e duhura për të mbështetur një transferim. Pavarësisht se Ramsdale është tashmë zgjedhja e dytë përsa i përket portës, largimi i tij në janar shihet si problematik për trajnerin Arteta. Në rast se spanjolli Raya dëmtohet, atëhere Arteta do të duhet të mbështetet tek Karl Hein, portieri i tretë i skuadrës.
Ndërkohë tek Chelsea, Sanchez la lojën pasi u dëmtua në sfidën ndaj Tottenham. Vendin e tij e zuri Djordje Petrovi, portieri serb i cili gëzon besimin e trajnerit Pochettino. Petrovi ishte pikërisht një blerje e argjentinasit, por portieri i ri nuk ka ende eksperiencën e duhur për të zënë përfundimisht vendin e Sanchez në mes të sezonit. Djordje aktivizohej me New England Revolution në MLS, përpara se t’i bashkohej Chelsea.
Ndërkohë drejtuesit e bluve janë gjithashtu duke monitoruar Alessandro Buongiorno, mbrojtësin e talentuar të Torino. Ky i fundit është cilësuar si një nga mbrojtësit më të mirë të këtij sezoni në kampionatin italian, dhe ka tërhequr vëmendjen e shumë klubeve europiane. Kjo do të thotë se Chelsea mund të futet në një garë me Juventus, Inter apo dhe Roma për kartonin e Buongiorno. Torino ka refuzuar paraprakisht një ofertë nga një ekip italian, pasi beson se mund të përfitojë më shumë nga ofertat potenciale nga Premier League.
