Drejtuesit e West Ham janë duke përgatitur një ofertë të re, për shërbimet e mbrojtësit të Manchester United, Harry Maguire. Trajneri David Moyes është prej kohësh adhurues i mbrojtësit dhe duket se tekniku ka udhëzuar bordin drejtues për t’i dhënë përparësi transferimit të anglezit, gjatë merkatos së verës.
Edhe në merkaton e fundit verore, West Ham ishte në bisedime me Manchester United për të siguruar një marrëveshje për kartonin e mbrojtësit anglez. Megjithatë, kjo nuk u bë e mundur për shkak të kërkesave të larta financiare të “Djajëve të Kuq”. Maguire gjithashtu nuk ishte i gatshëm të bënte kompromis me pagën e tij, dhe transferimi nuk u realizua. Por kësaj rradhe gjërat duken më në favor të West Ham.
Maguire ka vetëm 1 vit të mbetur në kontratën e tij me Manchester United. Klubi sigurisht që nuk do ta humbasë lojtarin me kosto zero, dhe kjo do të thotë se vlera që “Djajtë e Kuq” do të kërkojnë për mbrojtësin, pritet të jetë më e vogël sesa ajo e kërkuar në merkaton e kaluar. West Ham pritet të ofrojë jo më shumë se 20 milionë paundë për Maguire, dhe do t’i ofrojë anglezit një kontratë 2 ose 3 vjecare, që do të jetë mjaft tunduese për të, duke garantuar kështu qëndrimin në Premier League.
Harry Maguire është aktivizuar 24 herë në të gjitha kompeticionet me Manchester United këtë sezon, duke shënuar dhe 2 gola. Kujtojmë se “Djajtë e Kuq” shpenzuan plot 85 milionë paundë në vitin 2019 për të sjellë mbrojtësin në Old Trafford nga Leicester City, por paraqitjet e tij nuk kanë qënë bindëse. Largimi i Maguire ka akoma më shumë gjasa të ndodhë, duke marrë parasysh planet e Manchester United për një ndryshim të thellë në strukturën e klubit, dhe një plan afatgjatë për të ardhmen.