Klubi i Everton ka njoftuar zyrtarisht shkarkimin e trajnerit Frank Lampard. Ish-futbollisti anglez u vendos në krye të pankinës së Goodison Park vitin e kaluar, por rezultatet zhgënjyese të Everton këtë sezon, duket se kanë bindur drejtuesit e klubit për hapin e ndërmarrë.
Everton u mposht nga West Ham në ndeshjen e fundit në Premier League, dhe kjo regjistroi humbjen e 9 në 12 takime për ekipin, që renditet i parafundit në klasifikimin e përgjithshëm në kampionatin anglez. Everton ka lënë pas vetëm Southampton në renditje, por edhe kjo falë diferencës së golave, pasi ekipet kanë të njejtin numër pikësh. Skuadra gjithashtu u eleminua në FA Cup nga Manchester United, pas humbjes 3-1. Gjithsej, Everton ka siguruar vetëm 3 fitore këtë sezon.
Përpara shkarkimit të Lampard, drejtuesit e klubit u përballën dhe me presionin e fansave, të cilët kërkojnë ndryshime reale dhe afrime të reja nga bordi. Kujtojmë se Everton ende nuk ka sjellë asnjë lojtar të ri në skuadër, gjatë kësaj merkatoje. Pavarësisht se klubi shpenzoi plot 80 milionë paundë në verë, duket se përforcimet nuk kanë sjellë efektin e dëshiruar.
Edhe sezonin e kaluar, Evertoni i Frank Lampard kaloi një periudhë mjaft të vështirë. Në 18 ndeshjet e fundit ekipi pësoi 10 humbje, dhe ia doli të sigurojë mbijetesën në Premier League, vetëm në fitoren me përmbysje përballë Crystal Palace. Megjithatë, pritshmëritë për këtë sezon ishin të tjera, dhe duket se drejtuesit e klubit nuk kanë dashur të rrezikojnë më tej.
Ndërkohë në lidhje me të ardhmen e pankinës së Everton, ende nuk është e qartë se cili do të jetë pasuesi i Lampard. Mediat angleze aludojnë se legjenda e klubit, Duncan Ferguson, është një nga kandidaturat e forta për postin e trajnerit. Megjithatë, drejtuesit e klubit janë ende duke shqyrtuar të gjitha mundësitë.