Sipas mediave angleze, drejtuesit e Manchester United e kanë tashmë një emër në mendje, nëse Erik ten Hag do të shkarkohet nga posti i trajnerit tek “Djajtë e Kuq”. Bëhet fjalë për ish trajnerin e Chelsea, Graham Potter, i cili është tashmë i lirë.
Presioni po rritet gjithnjë e më shumë mbi Erik ten Hag, pas rezultateve mjaft negative në javët e fundit. Manchester United u mposht nga Bayern Munich me rezultatin 1-0 në Champions League, dhe kjo disfatë i dha fund futbollit europian për këtë sezon, për “Djajtë e Kuq”. Anglezët e mbyllën grupin në vendin e fundit, duke mos arritur të kualifikohen as në Europa League. Të besuarit e Ten Hag gjithashtu u mposhtën me rezultatin 3-0 në kampionat nga Bournemouth, një disfatë që la një shije mjaft të hidhur tek të gjithë fansat e klubit.
Pavarësisht presionit, Ten Hag nuk pritet të shkarkohet, deri në momentin që bilioneri anglez Jim Ratcliffe, të blejë zyrtarisht 25% të aksioneve të klubit, ashtu sic ishte parashikuar në fillim. Në momentin që transferimi i aksioneve zyrtarizohet, tek United pritet të ndodhin shumë ndryshime, duke filluar nga trajneri. Sipas mediave lokale, Ratcliffe mbetet një adhurues i madh i Potter, pavarësisht eksperiencës negative të këtij të fundit tek Chelsea.
Ndërkohë United e presin në vijim përballje akoma më të vështira. “Djajtë e Kuq” do të udhëtojnë drejt Liverpool për t’u përballur me ekipin e Klopp në Anfield. Kapiteni Bruno Fernandes nuk do të jetë i disponueshëm për shkak të kartonave të verdhë, ndërkohë që Harry Maguire dhe Luke Shaw gjithashtu janë në dyshim për shkak të dëmtimeve.
Pas sfidës ndaj Liverpool, të besuarit e Ten Hag i pret një tjetër takim i vështirë ndaj Aston Villa, që ka siguruar fitore mbreslënëse në javët e fundit ndaj Arsenal dhe Manchester City.