Manchester United kryeson garën për kartonin e talentit të Everton, Jarrad Branthwaite. Anglezi është një ndër lojtarët që ka rënë më shumë në sy gjatë këtij sezoni të Premier League, dhe duket se drejtuesit e “Djajëve të Kuq” kanë piketuar mbrojtësin si objektivin kryesor për merkaton e ardhshme të verës.
Sipas mediave angleze, bordi i Manchester United është i vendosur të sjellë Jarrad Branthwaite në Old Trafford, pavarësisht fatit të trajnerit Erik ten Hag, i cili mbetet në rrezik shkarkimi për sezonin e ardhshëm. Investitori i ri i klubit, Sir Jim Ratcliffe është i vendosur të sjellë talente të reja në ekip. Kjo është jo vetëm pjesë e planit të ri afatgjatë për suksesin e United, por dhe një metodë për të përfituar sa më shumë financiarisht në të ardhmen.
Afrimi i Jarrad Branthwaite shihet si mjaft i rëndësishëm nga ana e Ratcliffe, për shkak të situatës së United në repartin difensiv. Raphael Varane dhe Casemiro pritet të largohen në verë, ndërkohë që e ardhmja e Harry Maguire ka qënë gjithmonë objekt spekullimesh. Kjo e bën Branthwaite zëvëndësuesin perfekt në planin afatgjatë.
Talenti i Everton është vetëm 21 vjec dhe është paraqitur 31 herë me Everton gjatë këtij sezoni. Anglezi ka një kontratë aktive me klubin deri në vitin 2027, por sipas të gjitha gjasave do të largohet në verë. Sidomos nëse Everton eleminohet nga Premier League në fund të sezonit. Nëse kjo ndodh, drejtuesit e klubit do të jenë të detyruar të largojnë disa prej lojtarëve. Momentalisht, kartoni i Branthwaite vlerësohet në shifrat e 70 milionë paundëve nga ana e bordit të Everton.
Vet lojtari thuhet se është i hapur për një transferim në Old Trafford, por mbetet të shohim nëse 2 klubet do të gjejnë akordin financiar.
