Drejtuesit e Liverpool po planifikojnë të hapin bisedimet për një kontratë të re me Andy Robertson, këtë verë. Sipas mediave angleze, klubi kërkon të diskutojë kontratën e re me Robertson, pas caktimit të një trajneri dhe drejtori sportiv të ri. Drejtuesit e Liverpool kanë besim se Robertson do të rinovojë kontratën e tij, por interesi nga një prej gjigandëve të Europës mund t’i komplikojë gjërat.
Bayern Munich thuhet se është i interesuar për shërbimet e Robertson, nisur dhe nga fakti se sipas të gjitha gjasave, bavarezët do të humbasin Alphonso Davies sezonin e ardhshëm. Ky i fundit pritet t’i bashkohet Real Madrid.
Robertson është mjaft popullor mes tifozëve të Liverpool dhe ka qënë një faktor mjaft i rëndësishëm në suksesin e “The Reds” gjatë viteve të fundit. Kujtojmë se Robertson iu bashkua Liverpool në vitin 2017 nga Hull City për vetëm 8 milionë paundë. Kontrata e tij aktuale skadon në vitin 2026, por drejtuesit e klubit duan të sigurohen se e ardhmja e Robertson është në Anfield.
Robertson është mbrojtësi i dytë me më shumë asiste në Premier League, ndërkohë që vendin e parë e mban shoku i tij i skuadrës Alexander-Arnold. Anglezi është gjithashtu në planet e Liverpool për të ardhmen dhe bordi drejtues po përgatit një kontratë të re për mbrojtësin.
Ndërkohë, në Anfield ende nuk është e qartë se cili do të jetë zëvëndësuesi i Jurgen Klopp në krye të pankinës. Emri i Xabi Alonso është më i lakuari në media, por trajneri i Bayer Leverkusen duket se është skeptik për të marrë një detyrë kaq të rëndësishme. Kontrata aktuale e teknikut spanjoll me Leverkusen skadon në vitin 2026, dhe Alonso është i prirur të udhëheqë klubin të paktën edhe sezonin e ardhshëm, duke qënë se ekipi do të luajë në UEFA Champions League.