Premier League ka akuzuar së fundmi Manchester City duke pretenduar se “qytetarët” kanë kryer mbi 100 shkelje të ndryshme të rregullave financiare. Sipas autoriteteve angleze mendohet se shkeljet kanë ndodhur ndërmjet viteve 2009 dhe 2018. Premier League gjithashtu ka akuzuar klubin për mungesë bashkëpunimi që prej startit të investigimeve.
Lajmi ka bërë bujë në mbarë botën, teksa City mund të përballet me ndëshkime të rënda, që mund të ndikojnë jo vetëm në ecurinë e tyre në kampionat, por dhe në kompeticionet ndërkombëtare. Klubi u përgjigj me një deklaratë zyrtare pas akuzave, duke lënë të kuptohet se nuk do të dorëzohet lehtë në këtë luftë ligjore:
“Manchester City është i befasuar nga lëshimi i këtyre shkeljeve të supozuara të rregullave të Premier League, veçanërisht duke marrë parasysh angazhimin e gjerë dhe numrin e madh të materialeve të detajuara, të cilat i janë dërguar Premier League. Klubi mirëpret shqyrtimin e kësaj çështjeje nga një komision i pavarur, për të gjykuar në mënyrë të paanshme tërësinë e provave të pakundërshtueshme që ekzistojnë në mbështetje të qëndrimit tone… Ne presim që kjo çështje të vendoset një herë e përgjithmonë.”
Për të qënë më specifik, City akuzohet për manipulime në lidhje me të ardhurat e klubit, kostot, si dhe kontratat me sponsorat. Premier League gjithashtu ka akuzuar klubin mbi shkelje të fair-playt financiar të vendosur nga UEFA, si dhe disa shkelje të tjera që lidhen me fitimet në Premier League.
Vërtetimi i akuzave pritet të vijë pas një procesi të gjatë ligjor, por në rast se ato vërtetohen, dënimet mund të jenë të rënda. Autoritetet e Premier League nuk kanë një kod të mirëpërcaktuar për situata të tilla, por ndëshkimet mund të konsistojnë në heqje pikësh, rishikimin e titujve kampionë, e deri në eleminimin nga Premier League në rastin më ekstrem.