Manchester City është ndalur në një barazim 2-2 në transfertën përballë West Ham, dhe duket se titulli kampion do të vendoset vetëm në javën e fundit të kampionatit anglez. “Qytetarët” e Pep Guardiolës u detyruan të përmbysnin avantazhin e dyfishtë të vendasve, për të rrëmbyer 1 pikë në London Stadium.
Ishte Jarrod Bowen ai që kaloi West Ham në avantazh në minutën e 24’ të takimit, përpara se të dyfishonte rezultatin, shumë pak para pushimit mes pjesëve. Për City ndërkohë ishte Jack Grealish që realizoi në minutën e 4’ të pjesës së dytë, për t’i dhënë ekipit të Guardiolës, shpresën për të barazuar rezultatin. Dhe barazimi do të vinte 20 minuta më vonë, por jo nga lojtarët e City. Ishte Coufal që me një autogol vendosi baraspeshën në fushë.
Miqtë kishin shansin perfekt për të fituar takimin, kur gjyqtari akordoi një penallti në favorin e tyre në minutën e 85’. Por Lukasz Fabianski ndali me sukses goditjen e Mahrez, duke thyer zemrat e tifozerisë mike.
Ky rezultat do të thotë se Manchester City është tashmë vetëm 4 pikë larg ndjekësve të Liverpool, të cilët kanë 1 ndeshje më shumë për të luajtur. Të besuarit e Klopp do të luajnë në transfertë përballë Southampton ditën e martë, ndërsa do ta mbyllin sezonin në date 22 maj përballë Wolves në Anfield. City nga ana tjetër do të luajë po në 22 maj ndeshjen e fundit të sezonit përballë Aston Villa.
Çështja e titullit mbetet përsëri në dorë të Manchester City, të cilët do të shpallen kampionë me një fitore në shtëpi ndaj Aston Villa. Por presioni do të jetë padyshim i lartë për të besuarit e Guardiolës. Detaj mjaft interesant është fakti se Aston Villa drejtohet nga Steven Gerrard, legjenda numër 1 në historinë e Liverpool. Pavarësisht se sot Gerrard është në një tjetër rol, ai padyshim që do të donte të ndihmonte ish-ekipin e tij të shpallej përsëri kampion në Premier League.