Drejtuesit e Manchester United duket se janë të vendosur të hidhen në garë, për talentin e Lille, Leny Yoro. Mbrojtës ka impresionuar me paraqitjet e tij në kampionatin francez, dhe kjo ka bërë që adoleshenti të tërheqë vëmendjen e shumë klubeve europiane. Përvec United, duket se dhe Liverpool po monitoron nga afër lojtarin, dhe në të ardhmen nuk përjashtohet mundësia e një beteje financiare mes 2 gjigandëve anglezë, për kartonin e Yoro.
18 vjecari është aktivizuar 32 herë në të gjitha kompeticionet me Lille këtë sezon, dhe konsiderohet një nga mbrojtësit më të mirë në Ligue 1. Sipas raportimeve të mediave angleze, klubi francez do të kërkojë minimalisht 60 milionë euro për shërbimet e Yoro, duke qënë se interesi për talentin pritet të jetë i lartë. United kërkon të sjellë në Old Trafford francezin, pasi ai shihet si zëvëndësuesi afatgjatë i Raphael Varane, i cili mund të largohet në verë.
Liverpool ndërkohë po e shikon me interes lojtarin, pasi drejtuesit e “The Reds” gjithashtu e shohin atë si zëvëndësuesin afatgjatë të Virgil van Dijk. Ky i fundit ka rigjetur formën e tij më të mirë në Anfield, por drejtuesit e Liverpool duan t’i paraprijnë largimit të tij të mundshëm.
Por përvec interesimit nga klubet e Premier League, Leny Yoro gjithashtu ka tërhequr vëmendjen e Real Madrid dhe PSG. Spanjollët nuk pritet të hidhen në sulm këtë merkato vere, pasi sipas të gjitha gjasave do të shpenzojnë një pjesë të madhe të buxhetit të tyre për të sjellë në Bernabeu Kylian Mbappe. PSG ndërkohë ka avantazhin e kampionatit, pasi lojtari e njeh mirë Ligue 1 dhe është familjarizuar me futbollin në Francë.
Mbetet të shohim se cili do të jetë destinacioni që lojtari do të zgjedhë, pasi për momentin, Yoro nuk ka lënë të kuptohen preferencat e tij personale.
