Manchester United ia doli të shënojë dy gola të vonë në Elland Road, duke siguruar një fitore shumë të vlefshme përballë Leeds në transfertë. Heroi i “Djajëve të Kuq” ishte përsëri Marcus Rashford, i cili në minutën e 80’ të sfidës goditi saktë topin me kokë, duke e dërguar atë në rrjetë pas krosimit të Luke Shaw. Ky ishte goli numër 21 për sulmuesin, që po kalon një sezon fantastik.
Më pas, vetëm 5 minuta më vonë, Alejandro Garnacho i cili u fut në fushë si zëvëndësues, ia doli të kalojë me shpejtësi mbrojtjen kundërshtare, përpara se të dërgonte topin në rrjetë, duke vulosur rezultatin e sfidës. Leeds pati rastet e veta për shënim, por nuk ia doli dot të mposhtë portierin De Gea, dhe fitorja mund të konsiderohet totalisht e merituar për Manchester United.
Rezultati është shumë i rëndësishëm për të besuarit e Ten Hag, të cilët ndodhen në vendin e tretë në renditjen e përgjithshme të Premier League. Newcastle United ndodhet në vendin e katërt, 5 pikë larg Manchester, por me një ndeshje më shumë për të zhvilluar. Leeds ndërkohë ndodhet në vendin e 17 në renditje, shumë pranë zonës së rënies nga kategoria.
Kjo sfidë ishte e rëndësishme dhe për Harry Maguire, i cili u rikthye si pjesë e formacionit titullar tek United. Në intervistën pas fitores, Maguire u tregua modest për rolin e tij në triumfin e ekipit, por u shpreh i lumtur për 3 pikët. Anglezi tha:
“Fitorja është gjëja më e rëndësishme, nuk jam unë. Unë jam kapiteni i skuadrës, vendos atë para vetes dhe pavarësisht nëse luaj apo jo, dua që skuadra të jetë e suksesshme. Deri tani ka qënë një sezon i mirë, ka vend për përmirësime dhe ndeshje të mëdha po vijnë, por është mirë të vish këtu, të mbash të paprekur portën dhe të marrësh një fitore të rëndësishme për fansat.”