Drejtuesit e Manchester United kanë piketuar mesfushorin brazilian të Wolves, Joao Gomes, si zëvëndësuesin e mundshëm të Casemiro. Ky i fundit pritet të largohet në verë, dhe Gomes duket zëvëndësuesi perfekt në planin afatgjatë për “Djajtë e Kuq”. Mesfushori pritet të bëjë debutimin e tij me kombëtaren e Brazilit ndërkohë që ka impresionuar dhe me paraqitjet e tij me Wolves në Premier League këtë sezon.
23 vjecari vlerësohet në shifrën e 40 milionë paundëve. Ai u bë pjesë e Wolves vetëm vitin e kaluar nga brazilianët e Flamengo. Agjentët e Manchester United kanë që monitorojnë Gomes, teksa përfaqësues të klubit ishin të pranishëm dhe në fitoren e Wolves ndaj Fulham me rezultatin 2-1.
Profili i Gomes i përshtatet dhe planit të ri që United pritet të ndjekë në merkato, nisur nga vizioni i Sir Jim Ratcliffe. Ratcliffe kërkon që klubi të ndalojë së shpenzuari shifra stratosferike për të sjellë në Old Trafford superstarë, dhe të fokusohet në rritjen, identifikimin dhe investimin tek talentet e reja.
Kujtojmë se Manchester United shpenzoi plot 70 milionë paundë për Casemiro në verën e vitit 2022. Megjithatë, braziliani ka vuajtur me dëmtimet këtë sezon dhe duket se kohës së tij në Old Trafford i ka ardhur fundi.
Ndërkohë përvec Joao Gomes, drejtuesit e Manchester United gjithashtu po monitorojnë një tjetër lojtar nga Wolves. Bëhet fjalë për anësorin Pedro Neto. “Djajtë e Kuq” janë të gatshëm të presin oferta për Antony në merkaton e verës, dhe në rast se ky i fundit largohet, nevojitet një zëvëndësues. Sidomos duke marrë parasysh faktin se Marcus Rashford gjithashtu mund të largohet në merkaton e verës. Paris Saint-Germain pritet të bëjë një ofertë stratosferike për anglezin. Klubi francez është në kërkim të një sulmuesi për të zëvëndësuar Kylian Mbappe, që sipas të gjitha gjasave do të largohet në fund të sezonit.