Manchester United regjistroi fitoren e tretë rradhazi nën drejtimin e trajnerit Erik ten Hag, teksa “Djajtë e Kuq” fituan minimalisht 1-0 përballë Leicester City në transfertë. Ishte Jadon Sancho ai që i dhuroi United golin e fitores në minutën e 23’, pas një pasimi të bukur të Marcus Rashford.
Për pjesën më të madhe të lojës United ishte në kontroll, teksa Leicester nuk gjeti asnjëherë ritmin e duhur për të rrezikuar seriozisht të besuarit e Ten Hag. I vetmi rast i rrezikshëm që të zotët e shtëpisë prodhuan ishte goditja e dënimit nga James Maddison, që u ndal në mënyrë fantastike nga portieri De Gea. Kujtojmë se “dhelprat” ende nuk kanë fituar një ndeshje këtë sezon të ri, dhe kjo ka rritur ndjeshëm presionin ndaj trajnerit Brendan Rodgers.
Performanca e Manchester United i ngjau shumë asaj në fitoren me Southampton. “Djajtë e Kuq” ishin solidë dhe të sigurtë në mbrojtje, pavarësisht se nuk prodhuan asgjë të veçantë në repartin e sulmit. Kjo ishte hera e parë që United fitoi 3 takime rresht, që prej prillit të vitit të kaluar.
Pas shënimit të golit të parë, të besuarit e teknikut Ten Hag u munduan disa herë të shfrytëzonin kundërsulmet për të gjetur golin e sigurisë. Megjithatë, me kalimin e minutave u pa se “Djajtë e Kuq” vendosën eventualisht të menaxhonin rezultatin, duke mos rrezikuar më tej. Për këtë u desh ndihma e brazilianit Casemiro, i cili me eksperiencën e tij i dha fund disa aksioneve të rrezikshme të Leicester, që mund të kishin sjellë golin e barazimit.
Motivimi po rritet gjithnjë e më shumë në Old Trafford, teksa sfida e rradhës do të jetë një tregues i vërtetë për nivelin e United. “Djajtë e Kuq” do të përballen me Arsenal, që ka fituar të gjitha përballjet e deritanishme në Premier League këtë sezon.
