Mediat angleze kanë konfirmuar se posti i Mauricio Pochettino si trajner i Chelsea është tashmë në rrezik. Blutë e Londrës pësuan një tjetër disfatë mjaft zhgënjyese ndaj Wolves me rezultatin 4-2 ditën e diel, dhe gjenden në vendin e 11 në renditjen e përgjithshme të Premier League. Megjithatë, londinezët kanë ende shance për të siguruar një trofe këtë sezon, teksa do të përballen me Liverpool në finalen e Carabao Cup.
Gjithsesi, presioni sa vjen e rritet për Pochettino. Chelsea ka shpenzuar më shumë se 1 miliardë paundë që prej ardhjes së pronarëve të rinj, por rezultatet e bluve nuk kanë qënë aspak pozitive. Mediat angleze gjithashtu kanë zbuluar se mes trajnerit argjentinas dhe drejtuesëve të klubit mund të ketë pasur disa polemika në lidhje me merkaton.
Armando Broja u largua drejt Fulham në formë huazimi, dhe pavarësisht dëshirës së Pochettino për të sjellë një zëvëndësues në janar, drejtuesit e klubit nuk e kanë miratuar këtë kërkesë. Për momentin bordi i Chelsea ende nuk ka marrë një vendim përfundimtar, duke marrë parasysh nevojën e klubit për stabilitet. Që prej ardhjes së pronarëve të rinj, Chelsea ka ndërruar 5 trajnerë të ndryshëm, dhe londinezët kanë nevojë për një plan të qartë afatgjatë. Megjithatë, duket se rezultatet e dobëta të Pochettino po bëhen gjithnjë e më shumë të vështira për t’u injoruar.
Pas humbjes së thellë 4-1 ndaj Liverpool, tekniku argjentinas u shpreh për të ardhmen e klubit:
“Në futboll gjëja më e rëndësishme është të ecësh përpara. Nuk duhet të ndikohesh nga rezultatet dhe duhet t’i përdorësh ato për t’u përmirësuar. Ne jemi një ekip i ri që ka nevojë për këtë situatë, duhet ta kalojmë këtë që të rritemi.”
Megjithatë, duket se drejtuesit e Chelsea janë tashmë të gatshëm të ecin përpara, pa trajnerin argjentinas në krye të skuadrës.