Manchester City prodhoi një përmbysje fantastike përballë Newcastle, duke arritur të shpëtojë 1 pikë nga një takim shumë i vështirë që u mbyll në shifrat 3-3. Të besuarit e Pep Guardiolës shënuan të parët që në minutën e 5’ me Gündogan, teksa goli krijoi iluzionin e një tjetër fitoreje rutinë për “qytetarët”. Por loja do të merrte një rrjedhë tjetër.
Newcastle prodhoi shanset e veta për gol, dhe baraspesha do të vinte në minutën e 28’ të takimit, kur Miguel Almiron dërgoi në rrjetë topin e krosuar nga Allan Saint-Maximin. Fillimisht pati një pretendim për pozicion të parregullt, por pas verifikimit me sistemin VAR, arbitri akordoi golin për Newcastle. Vetëm 10 minuta më vonë të zotët e shtëpisë gjetën golin e avantazhit me Callum Wilson, i cili përfitoi nga një pasim i shkëlqyer i Saint-Maximin, që tërhoqi pas vetes mbrojtjen e City.
Të besuarit e Pep Guardiolës patën shansin për të barazuar, por portieri Pope ndali me sukses goditjen e Haaland. Pas këtij momenti erdhi dhe goli i tretë i Newcastle. Kësaj rradhe ishte Trippier i cili me një goditje spektakolare dënimi realizoi një gol fantastik nga rreth 25 metra distancë.
Në këtë pikë u duk se City do të pësonte humbjen e parë të këtij sezoni, por “qytetarët” dëshmuan dhe një herë tjetër kualitetin e tyre në situata të vështira. Erling Haaland shënoi golin e dytë për miqtë në minutën e 60’ të takimit, pas një pasimi të Rodri brenda zonës. Presioni gjithnjë e në rritje i City u shpërblye dhe me golin e tretë, vetëm 4 minuta pas atij të Haaland. Kësaj rradhe ishte Bernardo Silva i cili dërgoi topin në rrjetë pas një asisti fantastik të të zakonshmit Kevin de Bruyne.
Në minutat e fundit të sfidës, asnjëra prej skuadrave nuk arriti të gjejë golin e fitores dhe përballja u mbyll me rezultatin 3-3.