Nottingham Forest ka prezantuar zyrtarisht Nuno Espirito Santo si trajnerin e ri të klubit, pas shkarkimit të Steve Cooper. Ky i fundit u shkarkua pas 2 viteve në drejtimin e klubit, dhe shkak u bënë paraqitjet e dobëta të Nottingham Forest këtë sezon. Klubi është mposhtur 5 herë në 6 përballjet e fundit në Premier League, si dhe ka fituar vetëm 1 herë në 13 ndeshjet e fundit. Momentalisht, Nottingham Forest mban vendin e 17 në renditjen e përgjithshme, dhe rreziku i rënies nga kategoria është real.
Nuno Espirito Santo ndërkohë ka firmosur për 2 vite e gjysmë me Nottingham Forest, dhe duket se objektivi për këtë sezon është mbijetesa. Nuno shpenzoi 4 vite si trajner tek Wolverhampton, ku ia doli me sukses të ngjisë klubin nga Championship në Premier League, ku Wolves u rendit për dy sezone rresht në vendin e shtatë. Klubi gjithashtu arriti të shkojë deri në cerekfinalet e Europa League.
Më pas Nuno la Wolves për të marrë drejtimin e Tottenham, por aventura e portugezit në Londër nuk shkoi si duhet. Tekniku u shkarkua brenda 4 muajve të parë nën drejtimin e spursave, pas një serie negative prej 5 humbjesh në 7 takime. Më pas Nuno iu bashkua Al-Ittihad në verën e vitit 2022. Portugezi ndihmoi klubin arab të fitonte titullin kampion, por u shkarkua në sezonin e ri, pas një serie rezultatesh jo pozitive.
Presidenti i Nottingham Forest, Evangelos Marinakis, dhe drejtuesit e tjerë të klubit, kanë shpenzuar një shumë relativisht të madhe financiare për lojtarë të rinj gjatë merkatove të fundit. Kjo do të thotë se Nuno do të ketë mundësinë të eksperimentojë me një sërë lojtarësh dhe taktikash, për të parë se cila është strategjia më e mirë për ekipin e tij të ri.
Ndeshja e rradhës për Forest është ajo ndaj Manchester United në shtëpi, në date 30 dhjetor.